Dili, 27 Jullu 2026 – Iha era dijitál no kompetisaun informasaun ne’ebé aumenta, mídia independente iha Timor-Leste kontinua hasoru dezafiu atu garante sustentabilidade ekonomika. Mídia lokál barak sei depende ba fonte rendimentu limitadu, falta planeamentu estratéjiku no la iha diversifikasaun fonte finanseira ne’ebé adekuadu.
Kondisaun ne’e bele afeta sustentabilidade operasionál no kapasidade mídia atu kontinua fornese informasaun ne’ebé kredível ba públiku. Ho konsiderasaun ba dezafiu hirak ne’e, Conselho de Imprensa de Timor-Leste (CITL) realiza formasaun Planu Negósiu ba Mídia, durante loron tolu, husi 27 to’o 29 Jullu 2026.
Formasaun ne’e fó oportunidade ba partisipante sira atu dezenvolve kapasidade iha planeamentu negósiu, jestaun finanseira, analiza merkadu, diversifikasaun fonte rendimentu no inovasaun dijitál, ho objetivu atu hametin sustentabilidade instituisionál mídia iha Timor-Leste.
Diretór Ezekutivu Conselho de Imprensa, Antonio Dias, hateten katak formasaun ne’e iha objetivu atu muda perspetiva jornalista no profisionál mídia kona-ba relasaun entre jornalizmu di’ak no sustentabilidade ekonomika.
Tuir Antonio Dias, partisipante sira sei aprende kona-ba oinsá analiza merkadu mídia, identifika oportunidade negósiu, kria estratéjia kompetitivu, no komprende konseitu báziku jestaun finanseira, inklui orsamentu, fluxu kaixa no projesaun ekonomika.
Nia mos subliña importánsia diversifikasaun fonte rendimentu, maibé tenke halo ho maneira ne’ebé la kompromete independénsia editorial no prinsípiu jornalístiku.
Formasaun ne’e loke husi Membru Conselho de Imprensa, Isabel M. F. de Jesus. Iha sesaun abertura, nia espera katak partisipante sira bele halo diskusaun konstrutiva, fahe esperiénsia no hetan koñesimentu foun ne’ebé bele aplika diretamente iha sira-nia instituisaun mídia.
“Espero katak partisipante sira bele aproveita oportunidade ida ne’e atu fahe esperiénsia, halo diskusaun konstrutiva no aprende buat foun ne’ebé bele aplika iha sira-nia mídia,” dehan Isabel M. F. de Jesus.
Formadór ba formasaun ne’e mak Ignatius Haryanto, fasilitadór internasionál ne’ebé iha esperiénsia iha área sustentabilidade mídia. Formasaun kombina teoria ho prátika, inklui elaborasaun draft planu negósiu real ba kada instituisaun mídia no aprezentasaun estudu kazu husi mídia sira iha kontestu ne’ebé hanesan.
Formasaun ne’e envolve lideransa, jestaun, marketing no ekipa finansa husi mídia online, imprensa, rádio no televizaun hamutuk na’in 24, kompostu husi mane na’in 10 no feto na’in 14.
Liu husi formasaun ne’e, CITL espera bele kontribui ba hametin kapasidade jestaun no sustentabilidade mídia iha Timor-Leste, atu mídia bele kontinua hala’o nia papel importante iha fornese informasaun ne’ebé kredível, independente no responsavel ba públiku.