Dili, 11 Jullu 2026 – Diresaun Jerál Tejouru (DJT), Ministériu Finansas (MF), hala’o monitorizasaun no avaliasaun ba ezekusaun Orsamentu Jeral Estadu (OJE) Conselho de Imprensa de Timor-Leste (CITL) ba trimestre dahaat (Q4) 2025 no trimestre dahuluk (Q1) no daruak (Q2) 2026.
Atividade monitorizasaun no avaliasaun ne’e ho objetivu atu Ministériu Finansas bele haree no avalia prosesu ezekusaun OJE iha CITL, inklui implementasaun planu no programa, atu identifika progresu no dezafiu sira, nune’e bele halo melloramentu iha prosesu ezekusaun orsamentu iha futuru.
Monitorizasaun ne’e mós sai hanesan parte ida husi esforsu atu hametin jestaun finanseira no garante ezekusaun orsamentu la’o tuir planu, prosedimentu no regra ne’ebé aplika.
MF halo monitorizasaun ba área espesifiku tolu importante mak hanesan Finansas, Aprovizionamentu no Forsa Traballu ho Mapamentu Conselho de Imprensa.
Iha rohan atividade, Diretór Ezekutivu Conselho de Imprensa, António Dias, hato’o agradesimentu ba Ministériu Finansas tanba kontinua hala’o monitorizasaun no avaliasaun ba prosesu ezekusaun OJE iha CITL kada tinan.
António Dias subliña katak CITL kontinua fó atensaun ba jestaun finanseira no ezekusaun orsamentu ho prinsipiu transparénsia, responsabilidade no akuntabilidade.
Nia hateten katak, atu garante prosesu ezekusaun OJE la’o ho di’ak, durante tinan 10 liu ona, funsionáriu sira ne’ebé destakadu ba área finansas no aprovizionamentu kontinua mantein iha área refere to’o agora. Funsionáriu sira ne’e mós hetan ona kapasitasaun no orientasaun liu husi Ministériu Finansas atu hasa’e sira-nia kapasidade iha jestaun finanseira no aprovizionamentu.
Iha oportunidade ne’e, Conselho de Imprensa husu ba Ministériu Finansas atu kontinua fó atensaun, monitoriza no akompaña prosesu ezekusaun orsamentu iha CITL, nune’e bele hametin liután boa governasaun, transparénsia no akuntabilidade iha jestaun OJE.
CITL sei kontinua servisu hamutuk ho Ministériu Finansas no entidade relevante sira atu garante prosesu jestaun no ezekusaun orsamentu la’o ho efisiénsia, transparénsia no tuir regra ne’ebé vigora.