Ainaro, 19 Agostu 2026 – Conselho de Imprensa de Timor-Leste (CITL), liuhusi programa televizaun Liberdade Imprensa Ha’u Nia Liberdade (LIHL), realiza entrevista ho tema “Papél Mídia iha Prosesu Desentralizasaun Administrativa no Poder Lokal iha Munisípiu Ainaro”.
Entrevista ne’e hala’o iha loron Kuarta-feira, 19 Agostu 2026, iha Gabinete PAM Ainaro. Programa ne’e konvida Prezidente Autoridade Munisípiu Ainaro, Manuela Georgina Carmo Bucar Corte-Real, no Konselleira Isabel M. F. de Jesus nu’udar oradór. Entrevista ne’e modera husi Pesoál CITL, Angelina Gusmão.
Entrevista ne’e foka ba papél no kontribuisaun mídia iha prosesu desentralizasaun administrativa no dezenvolvimentu poder lokal, inklui oinsá mídia bele apoia disseminasaun informasaun públika, promove partisipasaun komunidade no hametin transparénsia iha prosesu governasaun lokál.
CITL konsidera mídia nu’udar parte estratéjika iha prosesu dezenvolvimentu nasionál, liuliu iha implementasaun programa IX Governu Konstitusionál kona-ba desentralizasaun administrativa no governu lokál. Mídia iha responsabilidade importante atu fornese informasaun ne’ebé loos, relevante no asesível ba komunidade kona-ba prosesu no politika públika sira.
Liuhusi programa LIHL, CITL kontinua fó espasu ba diskusaun públika kona-ba asuntu sira ne’ebé relevante ba dezenvolvimentu demokrátiku, liberdade imprensa, liberdade espresaun no papél mídia iha prosesu governasaun no dezenvolvimentu nasionál.
Programa LIHL nu’udar inisiativa CITL nian atu promove literasia no konsiénsia públika kona-ba liberdade imprensa, responsabilidade média no papél jornalista sira iha sosiedade demokrátika.