Dili, 25 Agostu 2026 – Conselho de Imprensa de Timor-Leste (CITL) hala’o audiénsia ho Minister-Counselor husi Embaixada Repúblika Popular China iha Timor-Leste, Xu Xingqiang, iha sede Embaixada Repúblika Popular China, Dili, Timor-Leste.
Audiénsia ne’e nia objetivu prinsipál mak atu esplora inisiativa no oportunidade kooperasaun entre Conselho de Imprensa no Embaixada Repúblika Popular China, liuliu iha área mídia no jornalizmu, hodi hametin dezenvolvimentu paisajen mídia no promove prátika jornalizmu profisionál iha Timor-Leste liuhusi parseria no kooperasaun mutuamente benefísiu.
Iha enkontru ne’e, delegasaun Conselho de Imprensa lidera husi Prezidente António M. da C. M. Mali, hamutuk ho Konselleira Suzana Bui Rai Carlota Cardoso, Konselleiru Joaquim de Fátima Coutinho, Diretór Ezekutivu António Dias, Diretór Relasaun Institusionál no Informasaun (DRII) Altino da Cruz Freitas, Pesoál Kooperasaun Estanislau da Costa Lourdes, no Pesoál Gabinete Angelina Gusmão.
Enkontru ne’e mós sai nu’udar oportunidade ida atu haforsa relasaun institusionál no identifika área sira ne’ebé bele dezenvolve liután liuhusi kooperasaun entre Conselho de Imprensa no Embaixada Repúblika Popular China.