Dili, 13 Agostu 2026 – Conselho de Imprensa de Timor-Leste (CITL), Sekretária Estadu Komunikasaun Sosiál (SECOMS) no organizasaun jornalista sira, ne’ebé reprezenta husi Asosiasaun Jornalista Timor Lorosa’e (AJTL), Timor-Leste Press Union (TLPU) no Uniaun Profisaun Jornalista Timor-Leste (UPJTL), hala’o enkontru koordenasaun atu prepara komemorasaun Loron Nasionál Liberdade Imprensa (LNLI) 2026.
Enkontru ne’e hala’o iha Salaun Formasaun SECOMS, Quintal Boot, Dili, iha 12 Agostu 2026, ho objetivu atu hametin koordenasaun no kolaborasaun entre entidade sira ne’e, liuliu iha preparasaun ba atividade sira atu hala’o iha ámbitu komemorasaun LNLI tinan 2026.
Iha enkontru ne’e, parte sira diskute kona-ba preparasaun, koordenasaun no organizasaun atividade sira ne’ebé sei hala’o hodi komemora Loron Nasionál Liberdade Imprensa. Komemorasaun LNLI 2026 sei realiza iha Dili.
Kooperasaun entre CITL, SECOMS no organizasaun jornalista konsidera importante atu garante komemorasaun ne’e la’ós de’it sai hanesan atividade serimonial, maibé mós sai oportunidade atu hametin kompromisu hamutuk ba promosaun liberdade imprensa, protesaun jornalista no dezenvolvimentu mídia ne’ebé independente no profisionál iha Timor-Leste.
Loron Nasionál Liberdade Imprensa iha Timor-Leste estabelese liuhusi Rezolusaun Parlamentu Nasionál Nú. 49/V (4.ª), ne’ebé Parlamentu Nasionál aprova iha sesaun plenária ordinária, iha 24 Maiu 2022.