Dili, 6 Agostu 2026 – Conselho de Imprensa de Timor-Leste (CITL) fasilita formasaun Jornalízmu Dadus ba jornalista na’in 29 durante loron tolu, hahu husi 4 to’o 6 Agostu 2026, iha salaun enkontru Conselho de Imprensa, Quintal Boot, Dili.
Formasaun ne’e ninia objetivu atu hasa’e kapasidade no koñesimentu jornalista sira iha área jornalízmu dadus, atu bele produz reportajen ne’ebé bazeia ba dadus, kle’an no kredivel.
Iha serimónia enseramentu, Prezidente Conselho de Imprensa, Antonio M. da C. M. Mali, hato’o agradesimentu ba formadór, Priyambodo RH, tanba nia fahe ona nia esperiénsia no koñesimentu ba jornalista Timoroan sira durante formasaun ne’e.
Prezidente CITL dehan katak jornalízmu dadus sai hanesan dezafiu ida ne’ebé importante ba dezenvolvimentu mídia iha Timor-Leste. Tuir nia, Primeiru-Ministru Timor-Leste dala barak bolu atensaun ba jornalista sira atu halo investigasaun no peskiza kle’an, atu informasaun ne’ebé públika bazeia ba dadus no faktu, la’ós deit opiniaun ka deklarasaun.
“Iha era dijitál ohin loron, jornalista labele depende de’it ba entrevista. Jornalista tenke hatene buka, análiza no interpreta dadus atu produz reportajen ne’ebé kle’an, no bele aumenta konfiansa públiku ba mídia,” dehan Antonio Mali.
Nia mós espera katak koñesimentu ne’ebé hetan husi formasaun ida ne’e bele aplika iha servisu lorloron, atu mídia sira iha Timor-Leste bele produz kontéudu jornalístiku ne’ebé bazeia ba evidénsia, promove transparénsia, akuntabilidade no suporta prosesu dezenvolvimentu nasaun.
Prezidente CITL dehan ba formandu sira katak ba oin jornalizmu dadus labele hela hanesan buat bain-bain ida maibé sai hanesan kultura ida ba mídia idak-idak hodi bele buka dadus, analiza dadus, nune’e bele produs notisia ne’ebé kredivel bazeia ba peskiza.
Formadór ba formasaun ne’e mak Priyambodo RH, antigu jornalista iha Ajénsia Notisioza Indonesia ANTARA, eis Diretór Lembaga Pers Dr. Soetomo (LPDS), Jakarta, no atualmente servisu hanesan formadór no ezaminadór kompeténsia jornalista iha Dewan Pers Indonesia.
Durante loron tolu nia laran, partisipante sira aprende kona-ba prinsípiu jornalízmu dadus, métodu buka no verifika dadus, analiza informasaun, no oinsá transforma dadus sai reportajen ne’ebé fasil atu komprende no iha impaktu ba públiku.
Ikus liu, Prezidente CITL, Diretór Ezekutivu, Diretór DADM, hamutuk ho formadór entrega sertifikadu ba partesipante sira ne’ebé konsege tuir formasaun refere durante loron tolu to’o remata.
Jornalista na’in 29 ne’ebé tuir formasaun mak hanesan Madalena de L. A. Guterres (Media Mudansa), Novai Magno (Timor Post), Claudino de A. Cabral (GMN), Carlita Carvalheira (Radio Lorico Lian), Camilio de Sousa (TATOLI.IP), Vinsensius S. M. de Araujo (Online SapNews.tl), Nelson B. Ferreira (Media Demokrasia), Suzana B. R. C. Cardoso (Media One Timor), Arminda de Carvalho (RTTL. EP), Graciela R. L. da Silva (Online Loluwari), Octaviana da Costa (Jornál Dili Post), Mariano M. Benevides (Jornál Independente), Rojert S. F. de Fatima (RaKom Oe-cussi), Jose M. F. Colo (RaKom Oe-cussi), Joaquina Seixas (RaKom Maliana), Belchior M. Alves (RaKom Ermera), Eduardo T. Exposto (RaKom Liquiça), Paulus de Araújo (RaKom Covlima), Inés do Carmo (RaKom Same), Imaculada M. E. Santo (RaKom Maubisse), Natalino J. M. do Rego (RaKom Maubisse), Pascoal N. de Jesus (RaKom Aileu), Floréncia B. da Cunha (RaKom Manatuto), Feliciano V. Belo (RaKom Baucau), Florindo da C. S. de Jesus (RaKom Viqueque), Ermelinda da S. Pereira (RaKom Lospalos), Sinta da Costa (RaKom Lospalos), Lúcia dos S. Ximenes (Online Lian Orluli), Clementina F. da C. Araújo (Online Lian Orluli).