Dili, 09 Jullu 2026 – Conselho de Imprensa de Timor-Leste (CITL), realiza atividade Forum Editoriál ba daruak hodi ko’alia kona-ba Projeto Lei Sétima Alterasaun Kódigu Penál Kona-ba Kriminalizasaun ba Difamasaun no Injúria sira iha Timor-Leste.
Atividade ne’e realiza iha salaun enkontru Conselho de Imprensa, Quintal Boot, Dili, ho objetivu atu bele diskuti hamutuk entre órgaun no meiu komunikasaun sosiál sira hamutuk ho péritu jurídiku, sosiedade sivil, no Conselho de Imprensa kona-ba prosesu alterasaun lei kódigu penal ne’ebé sei fó impaktu ba liberdade imprensa no liberdade espresaun iha Timor-Leste.
Atividade ne’e ofisialmente loke husi Prezidente Interina, Konselleira Suzana Bui Rai Carlota Cardoso. Iha nia diskursu hatete biban ida ne’e importante tebes atu jornalista, editór no Xefe Redasaun sira bele troka hanoin hamutuk ho oradór sira kona-ba asuntu legál ne’ebé oras ne’e dadaun sai preokupasaun públiku nian.
Oradór iha kolókiu públiku ida ne’e mak Adjunto Provedór, Rigoberto Monteiro, Diretora JSMP, Ana Paula Marçal no Jurista Juniór, Pelagio Simões Belo. Atividade ne’e mós partisipa husi Jornalista, Editór, Xefe Redasaun, no Asosiasaun Jornalista sira, Sosiedade Sivil, PDHJ.