Dili, 25 Juñu 2026 – Conselho de Imprensa de Timor-Leste (CITL), iha kooperasaun ho ABC International Development (ABCID), ensera ona formasaun kona-ba “Abilidade Dijital” ba jornalista hamutuk na’in 11.
Formasaun ne’e hala’o durante loron tolu, hahú husi loron 23 to’o 25 Juñu 2026, iha Palm Business, Hudi Laran, Dili. Atividade ne’e ensera diretamente husi Prezidente Interina Conselho de Imprensa, Suzana Bui Rai Carlota Cardoso.
“Tinan ida ne’e Conselho de Imprensa nia foku ba kapasitasaun jornalista sira. Governu fó fiar ba Conselho de Imprensa liuhusi Orsamentu Jerál Estadu hodi fasilita formasaun ba jornalista sira. Aleinde ne’e, liuhusi kooperasaun entre CITL ho ABCID fasilita mós formasaun ba jornalista sira. Ita espera katak iha tinan 2027 bele hetan rezultadu di’ak liuhusi produtu jornalístiku ne’ebé kualidade,” dehan Prezidente Interina Conselho de Imprensa, Suzana Cardoso bainhira ensera atividade formasaun refere.
Hafoin formasaun remata, CITL hamutuk ho ABC International Development entrega sertifikadu ba jornalista sira ne’ebé tuir formasaun refere to’o remata. Liuhusi formasaun ne’e, CITL ho ABCID espera katak jornalista sira bele aumenta tan sira nia koñesimentu no abilidade dijital, atu bele apoia sira nia kareira profesional iha mundu jornalízmu.
Formasaun Abilidade Dijital ne’e konkretiza liuhusi akordu kooperasaun entre Conselho de Imprensa de Timor-Leste no ABC International Development, ho objetivu atu hasa’e kapasidade téknika, intelektuál, no profesional jornalista sira nian.
CITL konsidera katak iha tempu dijitalizasaun ida-ne’e, jornalista sira presiza iha koñesimentu no kapasidade ne’ebé adekuadu atu bele hala’o sira nia knaar loron-loron ho responsabilidade, profesionalizmu, no tuir prinsipus étika jornalístika.