Dili, 30 Juñu 2026 — Conselho de Imprensa Timor-Leste (CITL) realiza enkontru avaliasaun trimestral daruak ba implementasaun planu asaun anuál CITL nian iha tinan 2026. Enkontru ne’e hala’o iha salaun enkontru Conselho de Imprensa, Quintal Boot, Dili.
Enkontru avaliasaun ne’e prezide diretamente husi Prezidente Interina Conselho de Imprensa, Suzana Bui Rai Carlota Cardoso, no partisipa husi membru sira, Fiskál Úniku, Diretór Ezekutivu, kargu xefia, no funsionáriu sira Conselho de Imprensa nian.
Avaliasaun ne’e ho objetivu atu haree fila-fali serbisu sira ne’ebé parte ezekutivu implementa ona durante trimestral daruak, nomós atu halo reflesaun hamutuk kona-ba oinsá mak bele mellora di’ak liután implementasaun serbisu sira iha semestre ikus tinan 2026.
Iha enkontru ne’e, partisipante sira mós avalia atividade Dili Dialogue Forum no halo aprezentasaun Nota Konseitu ba Komemorasaun Loron Nasionál Liberdade Imprensa.
Aleinde ne’e, liuhusi enkontru refere, CITL mós akumula ideia no kontribuisaun husi órgaun plenáriu, ezekutivu, no fiskál úniku kona-ba polítika, planu, programa, atividade, no orsamentasaun ba tinan 2027, molok submete Proposta Programa, Atividade no Orsamentu ba Governu.
Liu husi avaliasaun trimestral daruak ne’e, CITL espera katak implementasaun planu asaun anuál bele sai di’ak liután, transparente, no orientadu ba fortalese funsaun Conselho de Imprensa iha dezenvolvimentu liberdade imprensa no profisionalizmu mídia iha Timor-Leste.