Dili, 15 Juñu 2026 – Conselho de Imprensa de Timor-Leste (CITL), realiza formasaun jestaun servisu arkivu eletróniku ba funsionáriu Conselho de Imprensa hamutuk na’in 20.
Formasaun durante loron haat, hahú husi 15-18 Juñu 2026, hala’o iha salaun enkontru Conselho de Imprensa, Quintal Boot, Dili. Formasaun ne’e abertura direta husi Prezidente Interina Conselho de Imprensa, Konselleira Suzana Bui-Rai Carlota Cardoso, no akompaña husi Diretór Jerál Arkivu Nasionál Timor-Leste (ANTL), Fernando D. de Almeida e Sousa Junior, Diretór Ezekutivu CITL, Antonio Dias, Kargu Xefia sira husi ANTL, no INAP ho Diretór Rekursu Umanu CITL, Nelson Philomeno R. de Jesus.
Objetivu husi formasaun ne’e maka atu hasa’e kapasidade funsionáriu sira Conselho de Imprensa nian atu jere, konserva, no asegura dokumentu/dokumentasaun instituisaun nian ho sistema arkivu eletróniku ne’ebé efisiente, seguru, no transparente.
Iha loron dahuluk formasaun nian fasilita husi parte Institutu Nasionál Administrasaun Públika (INAP), Jose da Costa Graciano kona-ba Jestaun Arkivu.
Formasaun durante loron haat sei fasilita husi parte Institutu Nasionál Administrasaun Públika (INAP), Komisaun Funsaun Públika (KFP), Arkivu Nasionál Timor-Leste (ANTL). Iha loron ikus formasaun nian, formandu sira sei halo vizita ida ba edifísiu Arkivu Nasionál Timor-Leste (ANTL) hodi hare direta sistema serbisu Arkivu iha ANTL.
Formandu ba formasaun ne’e hamutuk na’in 20 husi diresaun lima Conselho de Imprensa nian hanesan Diresaun Apoiu Jurídiku no Supervizaun, Diresaun Analiza no Dezenvolvimentu Mídia, Diresaun Relasaun Institusionál no Informasaun, Diresaun Serbisu Koorporativu, no Diresaun Rekursu Umanu.