Dili, 08 Juñu 2026 – Conselho de Imprensa de Timor-Leste (CITL) realiza formasaun “Feature Writing” ba jornalista na’in 19 husi média nasionál no munisípiu sira. Atividade ne’e hala’o durante loron lima, hahu husi loron 8 to’o 12 Juñu 2026, iha salaun enkontru Conselho de Imprensa, Quintal Boot, Dili.
Formasaun ida ne’e loke ofisialmente husi Prezidente Interina Conselho de Imprensa, Konselleira Suzana Bui-Rai Carlota Cardoso, ne’ebé iha ninia intervensaun enfátiza importánsia papel Conselho de Imprensa nian hodi hasa’e kapasidade jornalista sira atu produz kontéudu jornalístiku ne’ebé kualidade no nakonu ho kreatividade hodi responde ba nesesidade informasaun públiku.
Objetivu husi formasaun ida ne’e mak atu hasa’e kapasidade no koñesimentu jornalista sira iha área hakerek feature news, hodi produz kontéudu jornalístiku ne’ebé profundu, atrativu no sensível ba interese públiku. Liuhusi treinamentu ida ne’e, partisipante sira sei aprende téknika identifikasaun ángulu istória, métodu rekolla informasaun, entrevista aprofundadu, no estrutura hakerek feature ne’ebé efetivu.
Formasaun ne’e fasilita husi antigu jornalista husi TEMPO nomós ativu hanesan formadór iha LPDS-Jakarta, Untung Widyanto, ne’ebé iha esperiénsia naruk iha área jornalizmu no hakerek feature.
Conselho de Imprensa espera katak atividade ida ne’e bele kontribui ba dezenvolvimentu kapasidade profisionál jornalista sira no hasa’e kualidade produtu jornalístiku iha Timor-Leste, liuhusi pratika jornalizmu ne’ebé étiku, responsável no orientadu ba interese públiku.