Partisipante sira aprende kona-ba indústria animasaun 3D, prinsípiu báziku animasaun personajen, animasaun atuasaun no téknika movimentu personajen. Iha sesaun pratika, sira mós aprende kona-ba rigging karakter 3D, ekspresaun oin, lip sync, posing, body mechanics, animasaun walk cycle no run cycle, inklui utilizasaun kamera, iluminasaun (lighting), prosesu rendering no fluxo produsaun animasaun digital.
Iha loron daruak toó loron ikus, formasaun foka ba “2D/3D Animated Infographic Videos” no “Motion Graphics”. Partisipante sira aprende kona-ba konseitu multimedia visual, prinsipiu komunikasaun visual, diferensa entre animasaun 2D no 3D, no etapa produsaun vídeo infográfiku hanesan dezenvolvimentu ideia, preparasaun storyboard no dezenhu elementu gráfiku.
Aleinde ne’e, sira mós aprende fundamentu motion graphics, indústria kreativa digital no prosesu produsaun animasaun integradu. Liuhusi sesaun pratika direta, partisipante sira konsege kria ilustrasaun, animasaun báziku no kontéudu visual kreativu hanesan rezultadu husi aprendizajen durante formasaun.
Conselho de Imprensa espera katak liuhusi formasaun ida ne’e, pesoál sira bele hasa’e tan sira nia kapasidade profisionál iha área multimedia no komunikasaun visual, nune’e bele kontribui ba dezenvolvimentu mídia ne’ebé inovativu, kreativu no profisionál iha Timor-Leste.