Maubisse – Conselho de Imprensa de Timor-Leste (CITL) atribui sertifikadu apresiasaun ba jornalista na’in 20 ne’ebé remata ona formasaun Jornalízmu Investigativu, durante loron lima, hahú husi loron 20-25 Abril 2026.
Konselleiru Joaquim de Fátima Coutinho mak ensera atividade treinamentu jornalízmu no entrega sertifikadu ba jornalista sira, iha loron 25 Abril 2026, iha salaun Restaurante Sara, Postu Administrativu Maubisse, Munisípiu Ainaro.
Membru Conselho de Imprensa, Konselleiru Joaquim de Fátima Coutinho iha nia intervensaun haktuir importánsia husi treinamentu Jornalízmu Investigativu nune’e jornalista sira bele apriende kle’an liutan kona-ba reportájen investigativu ninian nune’e bele servi di’ak liutan públiku liuhusi produtu jornalístiku sira.
Treinamentu jornalista na’in 20 mai husi mídia nasional sira mak hanesan RTTL, EP, Hatutan.com, Rafa & NTV, STL, Diáriu Dili Post, Online Loluwari, SapNews.tl, Mídia Mudansa, Mídia Demokrasia, Mídia DFM, Rádiu Komunidade Mauloko, Online Lian Orluli, Rádiu Komunidade Komoro, no Rádiu Liberdade.
Formadór ba formasaun ne’e mai husi Formadór iha Majalah Tempo, Dosente no Ezaminadór ba jornalista sira iha LPDS, nomós hanesan Péritu Mídia iha Dewan Pers Indonesia, Lestantya R. Baskoro.
Matéria ne’ebé formadór fasilita durante semana ida mak hanesan, Perkenalan Investigative Reporting, Ciri-Ciri Jurnalisme Investigasi dan Metode Investigasi, Langka-langka Investigasi, Teknik Penulisan Investigative Reporting, Menghindari Jerat Hukum Laporan Investigative Reporting.