Maubisse, 20 Abril 2026 – Conselho de Imprensa de Timor-Leste (CITL), fasilita formasaun “Investigative Journalism” ba jornalista na’in-20 iha Postu Administrativu Maubisse, Munisípiu Ainaro, durante loron lima.
Formasaun ne’e partisipa husi jornalista mídia nasionál no lokál sira mak hanesan RTTL, EP, Ajénsia Notisioza TATOLI.IP, Hatutan.com, Rafa & NTV, STL, Diáriu Dili Post, Online Loluwari, SapNews.tl, Mídia Mudansa, Mídia Demokrasia, Mídia DFM, Rádiu Komunidade Mauloko, Online Lian Orluli, Rádiu Komunidade Komoro, no Rádiu Liberdade.
Formasaun ne’e abertura husi Konselleiru Joaquim de Fátima Coutinho, iha ne’ebé akompaña husi Fiskal Úniku Conselho de Imprensa, João P. H. L. da Costa, Diretór Ezekutivu, Antonio Dias, Diretór DADM, Alberico da Costa Juniór, no Formadór Lestantya R. Baskoro.
Konselleiru Joaquim de Fátima Coutinho husu atu jornalista sira aproveita ho didi’ak formasaun reportájen investigativu hamutuk ho Formadór Baskoro nune’e ba futuru jornalista idak-idak bele hatene liutan ninia papel hanesan jornalista iha mundu jornalízmu ninian.
Diretór Ezekutivu CITL mós iha espera katak depois de remata formasaun, jornalista idak-idak fila ba sira nia redasaun idak-idak hodi bele prodús obra jornalístika ne’ebé iha impaktu ba sosiedade, ba kredibilidade obra jornalístika iha Timor-Leste, no sistema demokrátiku ne’ebé saudavel liu iha Timor-Leste.
Formadór Lestantya R. Baskoro, S.Fils, S.H., MH nu’udar antigu jornalista iha Tempo Media Group, no oras ne’e dadaun nu’udar périku mídia iha Dewan Pers Indonesia, dosente no ezaminadór ba jornalista sira iha Lembaga Pers Dr.Soetomo (LPDS)-dewan Pers, Jakarta.