Thailandia - Conselho de Imprensa de Timor-Leste (CITL), nu’udar membru permante ida hosi organizasaun Southeast Asia Press Council Network (SEAPC-Net) ne’ebé simu mandatu ba prezidénsia organizasaun refere durante tinan rua hahu hosi 2023-2025.
Iha loron 26 fulan Marsu 2026, Conselho de Imprensa de Timor-Leste partisipa iha asembleia jeral SEAPC-Net ba daruak hamutuk ho membru permanente sira seluk hanesan Dewan Pers Indonesia (DPI), Myanmar Press Council (MPC) no National Press Council of Thailand (NPCT), iha Tinidee Trendy Bangkok Khaosan Hotel, Thailandia.
Asembleia Jerál ba daruak, membru SEAPC-Net define hamutuk orientasaun estratéjiku ba dezenvolvimentu rede (Workshop and Member fee), espansaun Membru foun no kooperasaun entre membru sira iha rejiaun. Aleinde ne’e, Conselho de Imprensa mós entrega relatóriu rezultadu serbisu durante mandatu ba membru SEAPC-Net.
Iha Aembleia Jerál ne’e mós membru permanente sira konkorda hodi deside Myanmar Press Council mak sei kontinua lidera organizasaun ne’e ba períodu tuir mai, 2027-2029. Nomos deside hodi estende prezidénsia Timor-Leste nian durante fulan ualu, hahú hosi Abril-Dezembru 2026 hanesan períodu tranzisaun, antes Myanmar simu prezidénsia foun iha Janeiru 2027. Desizaun ida ne’e reflete komitmentu atu asegura kontinuidade no preparasaun ne’ebé di’ak ba lideransa tuir mai.
Oinsá atu atrai membru foun sira seluk iha Azia hodi hola parte iha SEAPC-Net maka durante periodu espansaun Timor-Leste nia ne’e, rekomenda importante liu tenke iha semináriu ka Workshop ida hodi bele esplika lala’ok kontituisaun SEAPC-Net, mehi, vizaun no planu sira.
Atu hametin koordenasaun ba diskusaun ideia foun sira no asegura sustentabilidade, deside mós realizasaun enkontru online-via zoom kada fulan rua entre membru permanente sira no konkorda atu kontribui rasik (Transportation) ba atividade sira SEAPC-Net nian, inklui “Member fee” ho valor USD 100 kada tinan ba servisu sekretariadu rede ne’e rasik.
Relasiona ho espansaun, deside membru permanete sira kontinua halo aprosimasaun ho nasaun sira seluk iha Azia hodi haruka formuláriu aplikasaun nian no follow up nafatin ba formuláriu sira ne’ebé distribui ona. (CI)