Metinaro, 27 Marsu 2026 – Conselho de Imprensa de Timor-Leste (CITL), fasilita formasaun ba estudante Ensino Secundario Geral 20 Setembru-Metinaro no Ensino Secundario Geral Publica-Hera kona-ba “Media Literacy”.
Objetivu husi treinamentu ba literasia mídia nian bele ajuda estudante sira identifika informasaun ne’ebé loos, evita espalla informasaun falsu, dezenvolve abilidade krítiku, uza mídia ho matenek, hasa’e konxiénsia dijitál, no hasa’e partisipasaun demokrátiku, atu nune’e ema ida-idak bele sai sidadaun ne’ebé matenek liu, krítiku liu, hodi uza mídia sosiál.
Partisipa iha formasaun refere, estudante ESG 20 Setembru-Metinaro ESG Público-Hera hamutuk na’in 20 kompostu husi feto na’in 12 no mane na’in 8. Formasaun durante loron ida ne’e, fasilita husi seniór jornalista Zevonia Vieira, no Antigu fotógrafu, Lírio Fonseca, tékniku superiór CITL, Maria Bibel no Pesoál Monitorizasaun CITL, Donia Filomena Fernandes.
Treinamentu ne’e, ofisialmente loke husi membru Conselho de Imprensa, Konselleira Isabel Maria Fernandes de Jesus no Diretór ESG 20 Setembru-Metinaro.