Covalima, 23 Marsu 2026 — Conselho de Imprensa de Timor-Leste (CI) hala'o treinamentu jornalizmu ambiental ba jornalista sira iha Munisípiu Covalima hahú husi loron 23 to'o 24 Marsu 2026.
Treinamentu ne'e ho tema "Mídia ho Asaun: Enkoraja Sidadaun Sira atu Hadomi no Proteje Ambiente", ne’ebé nia foku espesiál ba impaktu Mega Projetu Suai Supply Base (SSB) ba ambiente, sosiedade sira, no ekonomia iha Munisípiu Covalima.
Treinamentu ne'e partisipa husi jornalista na'in-12, kompostu husi mídia online Dili Post, mídia GMN, rádiu RCC, online Hatutan.com, mídia One Timor, online DFM, rádiu RLD, online mídia Mudansa, online Lafaek News, no rádio komunidade Cova Taroman-Suai.
Formadór ba formasaun refere mak hanesan Prezidente Autoridade Munisípiu Covalima, Miguel Armada, Koordenadór Ambiental Munisípiu Covalima, Domingos Docer, Diretór Diresaun DADM, Alberico da Costa Junior.
Materia ne’ebé fó husi formadór sira mak hanesan, lei ambiental Timor-Leste nian (inklui Lei No. 26/2012 no prosesu avaliasaun impaktu ambiental/EIA), materia Relasaun entre dezenvolvimentu no impaktu ambiental, no prinsipiu jornalizmu ambiental.
Treinamentu iha Covalima nu’udar parte ida husi programa nasionál Conselho de Imprensa ne'ebé antes ne’e hala'o ona iha Munisípiu Liquiça iha tinan 2024 ne’ebé hetan kooperasaun ho UNDP no iha Munisípiu Lautem iha tinan 2025 liu ba.