Conselho de Imprensa Atribui Karteira Profesional ba Jornalista Na’in 10

Dili, 23 Dezembru 2025 – Conselho de Imprensa de Timor-Leste (CITL) atribui Karteira Profesionál ba jornalista na’in 10 ne’ebé konklui ona sira nia prosesu estájiu karteira profesional. Serimónia atribuisaun Karteira Profesionál hala’o iha salaun enkontru Conselho de Imprensa, Quintal Boot, Dili, iha loron tersa-feira, 23 Dezembru 2025. Jornalista na’in 10 ne’ebé hetan títlu profesionál husi Conselho de Imprensa mak hanesan Joanita da Silva Corte-Real (RTTL, EP), Domingos M. Moreira Soares (G-RTV), Camilio de Sousa (TATOLI.IP), Maria Auxiliadora F. Ximenes (TATOLI.IP), Maria Angelita Sandi Belo (Media Mudansa), Celestina Soares de Oliveira (The Dili Weekly), Felisidade da Costa Ximenes (TATOLI.IP), Octavia Maria de Rosa (Radiu Liberdade), Jacinta Lemos (GMN-TV), Domingos da Piedade Freitas (LUSA). Haktuir iha lei komunikasaun sosiál artigu 13 kona-ba hala’o profisaun iha Alinea 1 haktuir kondisaun atu hala’o profisaun jornalista nian maka abilitasaun ho nia títlu rasik hanaran karteira professional, ne’ebé Conselho de Imprensa mak fó no renova. Iha artigu 14 kona-ba asesu ba profisaun haktuir Asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian. Iha biban ne’e, Conselho de Imprensa Realiza mós Reflesaun Hamutuk ho Órgaun no Meiu Komunikasaun Sosiál sira iha Ámbitu Natal 2025 no Tinan Foun 2026, hodi hare hamutuk serbisu sira ne’ebé hala’o ona iha tinan 2025 no oinsá bele fó hanoin ba malu hodi bele hadi’a di’ak liutan iha tinan 2026.