Retiru Anuál CITL 2025: “Navega Dezafiu no Aproveita Oportunidade”

Railaco, 12 Dezembru 2025 – Conselho de Imprensa de Timor-Leste (CITL) realiza retiru anuál tinan 2025 iha salaun enkontru Sentru Treinamentu no Ekstensaun Agrikultura, Pe. Domingos Sequeira, Postu Administrativu Railaco, Munisípiu Ermera. Retiru anuál ho tema “Navega Dezafiu no Aproveita Oportunidade” ho objetivu atu bele hare fila progresu no dezafiu sira ne’ebé Conselho de Imprensa hasoru durante implementasaun Planu Asaun Anuál tinan 2025. Aleinde ne’e, oinsá maka bele identifika oportunidade sira kada diresaun sira iha Conselho de Imprensa nune’e bele mellora di’ak liutan serbisu órgaun reguladora ne’e hodi bele promove di’ak liutan Liberdade Imprensa no Liberdade Espresaun iha Timor-Leste. “Oportunidade ohin ne’e importante tebes ba ita atu prepara an hodi simu tempu natal. Ha’u espera katak diskusaun hotu ne’ebé halo nakonu ho krítika sira konstrutivu nune’e bele hadi’a di’ak liutan ita nia serbisu iha futuru,” haktuir Prezidente Conselho de Imprensa. “Kada tinan ita sempre buka tempu ida para tur hamutuk ho kakutak malirin hodi hare hikas saidá mak ita halo ona no saída mak ita seidauk hodi bele hadi’a hikas iha tinan oin. Ohin ita tur hanoin hamutuk hodi navega hamutuk no hakuak oportunidade hotu,” dehan Diretór Ezekutivu. Partisipa iha retiru anuál refere, Prezidente no membru sira Conselho de Imprensa, Diretór Ezekutivu ho kargu Xefia sira, Funsionáriu hotu, inklui mós Fiskál Úniku Conselho de Imprensa nian hamutuk na’in 50. Atividade anuál ne’e realiza durante loron 2, hahú husi 12-13 Dezembru 2025. Loron dahuluk, kada diresaun sira halo aprezentasaun kona-ba progresu, dezafiu no relatóriu diresaun nian. Diretór Ezekutivu mós aprezenta hikas kona-ba Avaliasaun Implementasaun no Rekomendasaun husi Retiru Anuál Maibisse iha tinan 2024. Fiskál Úniku mós halo aprezentasaun ida kona-ba prosesu ezekusaun orsamentu anuál 2025. Iha biban ne’e, Prezidente no Membru sira mós fó avaliasaun ba serbisu ezekutivu nian durante tinan 2025. Iha loron segundu, aproveita oportunidade iha tinan Jubeleu maka ekipa tomak Conselho de Imprensa nian sei halo peregrinasaun, reflesaun, konfesa no misa agradesementu iha kapela Fatubessi-Ermera. (CI)