Dili – Prezidente Repúblika, José Ramos Horta husu atu jornalista sira bele utiliza plataforma dijitál Intelijénsia Artifisiál ho loloos no matenek hodi bele benefisia komunidade ho maneira responsável.
Kestaun ne’e Prezidente Repúblika hato’o iha nia diskursu enseramentu ba atividade Forum Dialogu Dili, ne’ebé realiza iha loron sabadu, 10 Maiu 2025, iha salaun multiosos, GMN, Bebora Dili ho Tema “Impaktu Intelijénsia Artifisiál ba Liberdade Imprensa no mídia”.
Prezidente Repúblika hatete husi tinan 2018 nia komesa sai oradór kona-ba Intelijénsia Artifisiál (AI) iha Timor-Plaza, ho enfáse ba desafiu, oportunidade no difikultade sira ne’ebé AI bele fó iha situasaun instável tomak. Nia referese mós ba akontesimentu sira hanesan krime jenosida iha Rwanda, konfliktu iha Serbia, Gaza, Rohingya, India no Pakistan, no fó ezemplu kona-ba notisia falsu (8000 account) iha Jullu tinan 1994, sira ne’ebé militár uza atu kontrola informasaun, inklui iha programa direitu umanu no demokrátika iha Myanmar
Prezidente alerta katak AI bele fó risku boot, tanba ne’e nuúdar Xefe Estadu nia kapasidade la to'o atu kontrolla AI. Prezidente Repúblika deklara katak kapasidade jornalista tenke aumenta iha setór sira hotu, inklui área sientífika.
Atividade Forum Dialogu Dili tinan ne’e abertura husi Primeiru Ministru Kay Rala Xanana Gusmão iha parte dader, no iha parte lorokaik ensera husi Prezidente Repúblika José Ramos Horta.
Conselho de Imprensa de Timor-Leste (CI), anuálmente sempre realiza atividade Dili Dialogue Forum nu’udar forum ida oinsa maka bele fahe esperiénsia ba malu entre Conselho de Imprensa sira iha Rejiaun Suduéste Ajiátiku kona-ba asuntu-asuntu sira pertenente no relevante ba prosesu dezenvolvimentu seitór komunikasaun sosiál iha Timor-Leste no rejiaun.
Partisipa iha Atividade Dili Dialogue Forum, Primeiru Ministru, Kay Rala Xanana Gusmão, Pokuradór Jerál Repúblika, Prezidente Conselho de Imprensa ho membru sira, Prezidente CNE, Adjuntu PDHJ, Diretór Ezekutivu CNC, Prezidente Eleitu CI no Membru sira, Antigu membru CI, Parseiru Estratéjiku sira CI nian, ABCID, Jornalista sira husi Kupang (NTT), Diretór Mídia, Xefe Redasaun, Editór no Jornalista sira, Reprezentante Asosiasaun Jornalista, Jestór no Jornalista balun husi Rádiu Komunidade, Estudante Universitáriu sira, Funsionáriu tomak CI nian.