Dili, 17 Fevereiru 2025 – Conselho de Imprensa de Timor-Leste (CI), serbisu hamutuk ho Ajénsia Internasional ba Programa Nasoens Unidas ba Dezenvolvimentu (PNUD/UNDP), realiza “Media Dabate Training on Democracy”, hahú husi loron 17-21 Fevereiru 2025, iha Salaun João Paulo II, Comoro, Dili.
Partisipa iha formasaun ne’e mai husi jornalista hamutuk na’in 30 husi mídia estatál (RTTL, EP no Tatoli. IP), nomos mídia nasional sira hanesan Independente, Hatutan.com, Gardamor TV, Online Lafaek News, Online Media Mudansa, Radiu Komunidade Difisiénsia Timor-Leste, Online Neon Metin, Online SapNews, Radiu Liberdade, Diariu STL, Labeh, Timor Post, CEFTEC no GMN.
Objetivu husi formasaun ne’e maka atu eleva koñesimentu téknika jornalista sira nian kona-ba oinsá maka bele organiza di’ak liutan debate televizivu no debate iha rádiu hodi bele akumula ideia oin-oin husi fontes sira kona-ba asuntu-asuntu espesifiku hodi hametin liutan demokrasia iha Timor-Leste.
Aleinde ne’e, bele hasa’e liutan koñesimentu jornalista sira nian oinsá maka bele halo debate krítiku ho fontes sira bainhira hala’o kna’ar jornalízmu iha terenu.
Formasaun ne’e realiza tanba serbisu hamutuk entre Conselho de Imprensa ho Ajénsia Internasional ba Programa Nasoens Unidas ba Dezenvolvimentu (PNUD/UNDP), no hetan apoiu fundus husi Governu Japaun.
Abertura ba formasaun refere partisipa husi, Sekretaria Estadu Komunikasaun Sosial, Reprezentante UNDP, Reprezentante Embaixada Japaun ba Timor-Leste, Diretór Ezekutivu CI ho estrutura, Diretór informasaun RTTL, EP, no maluk Jornalista sira. (CI)