Dili, 10 Fevereiru 2025 – Conselho de Imprensa de Timor-Leste (CI) entabelese nota entendimentu ho Servisu Registu no Verifikasaun Emprezarial, Institutu Públiku (SERVE, IP) hodi hametin Liberdade Imprensa no Liberdade Espresaun iha Timor-Leste.
Nota entendimentu ne’ebé asina husi Prezidente Conselho de Imprensa de Timor-Leste (CI) Otelio Ote hamutuk ho Diretór Ezekutivu SERVE,I.P, Fausto Soares Dias, nu’udar nesesidade atu hametin liña koordenasaun servisu intituisaun rua, nune’e bele tau matan ba órgaun no meiu komunikasaun sosiál Rádiu no Televizaun sira husi nível nasionál no internasionál ne’ebé hala’o atividade komunikasaun sosiál iha Timor-Leste, liu-liu iha parte registu komersiál nian.
Nota entendimentu ne’e hala’o iha Salaun Enkontru CI, Quintal Boot, Dili, Timor-Leste, segunda-feira ne’e.
Iha nia Deskursu, Diretór Ezekutivu Conselho de Imprensa, Antonio Dias lori Conselho de Imprensa nia naran agradese ba Esforsu tekniku husi parte rua nian, nomos jurista sira husi SERVE ho CI atu formula konteudu husi parte rua nia kooperasaun ne’ebé ohin ba oin sei tau iha pratika.
“Conselho de Imprensa hein dehan ita hahu kedan iha inisiiu tinan 2025, aranke di’ak ida ba SERVE ho CI, buat ne’ebé ita hotu hotu hein mak dehan ita nia kooperasaun ne’e la naton iha surat tahan leten maibé mai ita hamutuk lori ba prátika para saída mak ita hanoin hamutuk, saída mak ita mehi hamutuk ba Liberdade Imprensa no Liberdade Espresaun bele buras, prevalese, no bele moris naruk”, DE dehan.
Prezidente Conselho de Imprensa, Otelio Ote dehan nota entendimentu ida ne’e sei lori parte rua, haforsa liu tan baze de dadus ba Conselho de Imprensa.
“Ami durante ne’e loke oportunidade ba meius komunikasaun sosial sira, orgaun komunikasaun social atu rejistu iha ne’e, I Rekejitus ida importante mak ami tenki hatene kona-ba estatutu kompania nian, konaba lisensa aktividade, depois bele fasilita ami hodi halo rejistu”, Prezidente Esplika.
Nune’e mos Diretór Ezekutivu SERVE, I.P Fausto Soares Dias, dehan nia parte fiar katak parte tékniku no jurídiku husi parte rua nian hare ona katak sei lori benefisiu ba Conselho de Imprensa ho SERVE, I.P.
“Liga mai servisu SERVE, I.P nian tuir dekretu lei 83/2022, hatete momoos ona iha ne’eba”, tamba ne’e maluk Timor oan hotu ne’ebé mak hakarak investe iha imprensa ida karik, hakarak ka lakohi tenki liu husi Conselho de Imprensa hodi hare no prense kritériu ka lae hafoin ba SERVE,I.P atu rejistu iha ne’eba. (CI)