Dili – Conselho de Imprensa de Timor-Leste (CI) hala’o vizita ba mídia estatál rua hanesan Rádiu Televizaun Timor-Leste, Empreza Públika (RTTL, EP) no Ajénsia Notisioza TATOLI. IP.
Vizita Conselho de Imprensa nian ba hala’o iha loron 27 Janeiru 2025. Iha parte dader, Ekipa CI hala’o uluk enkontru ho Prezidente Konsellu Diretivu TATOLI. IP hamutuk ho kargu Xefia sira hotu.
Durante enkontru, Prezidente Conselho de Imprensa, Otelio Ote, Konselleira Isabel M. F. de Jesus esplika kona-ba kompeténsia sira CI nian. Aleinde ne’e, hato’o mós kona-ba progresu no dezafiu sira iha implementasaun programa no atividade sira ne’ebé Conselho de Imprensa realiza ona durante mandatu.
Iha oportunidade ne’e mós, Prezidente Conselho de Imprensa no Konselleira husu atu Ajénsia Notisioza TATOLI. IP kontinua sai hanesan referénsia ba mídia hotu. Husu mós atu TATOLI. IP kontinua independensia iha editorial.
Durante enkontru, parte rua halo diskusaun kona-ba infrasaun sira husi produtu jornalístiku bazeia ba monitorizasaun husi Conselho de Imprensa. Ko’alia uituan mós kona-ba atividade komemorasaun tinan 50 trajedia Balibo nomós prémiu sira ne’ebé sei atribui ba jornalista sira iha ámbitu komemorasaun loron nasionál Liberdade imprensa, 16 Outubru 2025, iha Postu Administrative Balibo.
Iha loron hanesan, parte loraik Conselho de Imprensa kontinua hala’o vizita ba Rádiu Televizaun Timor-Leste, Empreza Públika. Vizita ne’e simu direta husi Prezidente Konsellu Administrasaun RTTL, EP hamutuk ho Kargu Xefia sira.
Parte rua hala’o diskusaun kona-ba rezultadu monitorizasaun husi CI nomós notifikasaun sira ne’ebé Conselho de Imprensa diriji ba jornalista sira iha RTTL, EP. Aleinde ne’e, ko’alia mós kona-ba prosesu dezenvolvimentu seitór komunikasaun sosiál iha Timor-Leste ho nia ameasas sira ne’ebé sei enfrenta iha futuru.
Durante enkontru toka mós asuntu preparasaun ba komemorasaun tinan 50 trajédia Balibo, oinsá bele envolve mós RTTL, EP iha atividade refere, liu-liu oinsá mak RTTL, EP bele kontribui liuhusi transmisaun direta durante realizasaun atividade refere iha loron 16 Outubru 2025.
Conselho de Imprensa no RTTL, EP mós iha komitmentu atu kontinua hikas akordu kooperasaun ba realizasaun programa televizivu “Liberdade Imprensa Ha’u Nia Liberdade”. (CI)