Dili, 22 Janeiru 2025 – Conselho de Imprensa de Timor-Leste (CI) entabelese nota entendimentu ho Autoridade Nasional Komunikasaun (ANC), kuarta-feira, iha salaun enkontru CI, Quintal Boot, Dili, hodi hametin Liberdade Imprensa no Liberdade Espresaun iha Timor-Leste.
Prezidente Conselho de Imprensa, Otelio Ote iha nia intervensaun hatete Conselho de Imprensa marka istória importante ida tan tanba bele estabelese nota entendimentu ho ANC hodi bele tau matan di’ak liutan ba seitór komunikasaun sosiál iha Timor-Leste.
“Nota entendimentu ida ne’e bele hametin no haburas liutan ita nia serbisu iha área komunikasaun sosiál iha Timor-Leste,” Prezidente Otelio Ote hato’o iha nia intervensaun serimónia asina nota entendimentu refere.
Prezidente Autoridade Nasional Komunikasaun, Flávio Cardoso Neves hatete maske instituisaun rua refere idakidak ho nia kompeténsia maibé iha asuntu importante balun nesesita duni serbisu hamutuk entre CI ho ANC.
“Ha’u hakarak hatete ba kolega mídia sira katak kualker nota entendimentu ne’ebé ita halo atu fasilita la’ós atu impede,” akresenta Prezidente ANC.
Nota entendimentu ida ne’e nu’udar nesesidade atu hametin liña koordenasaun servisu intituisaun rua, nune’e bele tau matan ba órgaun no meiu komunikasaun sosiál Rádiu no Televizaun sira husi nível nasionál to’o internasionál ne’ebé halo atividade komunikasaun sosiál iha Timor-Leste.
Objetivu husi nota entendimentu ida ne’e maka, primeiro, garante asesu informasaun hodi fasilita, asegura kontrolu ba rádiu no televizaun ne’ebé rejista iha CI no ANC. Segundo, serbisu hamutuk kria mekanizmu kordenasaun ida di’ak iha prosesu atribuisaun lisensa frekuénsia ba meiu komunikasaun sosiál radiofóniku no televizaun.
Terseiro, halo supervizaun hamutuk ba fatin ou meius komunikasaun sosiál rádiu no televizaun, Quarto, estabelese fluxo ba prosesu rejistu meius no lisensa frekuénsia husi rádiu no televizaun iha CI no ANC. Quinto, dezenvolve atividade konjunta hodi promove instituisaun rua nia objetivu.
Nota entendimentu ne’e asina husi Prezidente Conselho de Imprensa, Otelio Ote no Prezidente Autoridade Nasional Komunikasaun, Flávio Cardoso Neves, no akompaña husi Konselleira Isabel M. F. de Jesus, Diretór ezekutivu CI ho estrutura no Diretór sira husi ANC. (CI)