Maubisse, 05 Marsu 2025- Conselho de Imprensa de Timor-Leste (CI) hamutuk ho ABC International DevelopmentStrategy (ABCID) realiza formasaun ba jornalista sira durante loron ida ho tema, “Kuidadu-án Rasik iha Espasu Online”, iha Postu Administrativu Maubisse Vila, Munisípiu Ainaro.
Formasaun ne’e hetan partisipasaun husi jornalista sira ne’ebé mai husi meiu komunikasaun sosiál hanesan, RTTL, GMN, Dili Post, Timor Post, Independente, Neon Metin, Lafaek News, Media Mudansa, SapNews TL, Media One Timor, Loluwari, LABEH, Rakom Liquiça, Rakom Maubisse, Rakom Aileu, RKDTL, RLD, ho total partisipante jornalista hamutuk na’in 18 kompostu hosi Feto 8 no Mane 10.
Formasaun ne’e abertura husi Prezidente Conselho de Imprensa de Timor-Leste, Otelio Ote, ho Senior Project Manajer ABCID, Fiona Churchman, ne’ebé akompanha husi Diretór DADM, Alberico da Costa Junior, no Nicolle White, ABC Social Media Safety Advisor.
Iha nia abertura, Senior Project Manager ABCID, Fiona Churchman hateten servisu iha era ida agora dadaun ho internet ne’ebé mak lais liu tan presiza prepara idak-idak nia-án.
“Tamba ne’e ohin loron ita iha ne’e ami nain rua sei ajuda prepara-án tamba ita mós iha tinan ida ne’e ou tinan oin Timor mós sei iha internet ne’ebé mak ho velosidade lais liu”, Senior Project Manager ne’e dehan.
Nune’e iha formasaun ida ne’e sira bele fahe nia esperiénsia saída mak sira aprende ona iha Australia ho Internet ne’ebé lais tebes no oinsá ema sira ka audiénsia sira hetan sira nia notísia la’ós ona iha televizaun de’it maibé sira barak mak agora hetan sira nia informasaun husi telephone no husi komputadór sira ne’e.
“ho ida ne’e ohin loron ita iha ne’e hodi prepara jornalista sira atu bele hasoru internet ne’ebé mai ho velosidade lais liu”, nia aumenta.
Iha ne’e mos katak Fiona Churchman, “ita sei hamutuk ho mana Nicolle White, mana ne’e peritus iha área online nian iha ABC Australia nian no iha ne’eba nia mos bain-bain apoiu Jornalísta sira iha ABC ninian, nomós kriadór konteudu ba Dijital nian no online ninian.
Prezidente Conselho de Imprensa de Timor-Leste, Otelio Ote Aproveita ida ne’e hakarak hatete ba partisipantes ba formasaun ida ne’e atu bele utiliza ho di'ak nune’e bele hetan esperiénsia ruma husi formasaun ne’e.
“Formasaun sira hanesan ne’e parte ida husi kompeténsia Conselho de Imprensa atu eleva ita nia kapasidade téknika, kapasidade profesionál no kapasidade intelektuál”, Prezidente hameno.
Prezidente Conselho de Imprensa hatete CI ho ABCID kontinua serbisu hamutuk hodi bele fasilita formasaun oi-oin iha área hanesan estratéziku planning, planu negósiu, no jestaun redasaun nian.
Formasaun durante loron ida nia laran ne’e ikus taka ho fahe sertikadu ba partesipante sira ne’ebé mai husi media oin-oin tantu media Emprime, Televizaun sira, Media online, Radiu Komunidade sira. Media CI