Dili – Conselho de Imprensa de Timor-Leste (CI) liuhusi Prezidente Otelio Ote, Konselleiru Benevides Correia Barros, Konselleiru Amito Araújo, Diretór DRII, Altino da Cruz Freitas, Pesoal Apoiu Kooperasaun, Santino Dare Matias no Pesoal Apoiu Gabinete SEAPC-Net, Juliana Imaculada Belo hala’o audiénsia ho Ministru Negósiu Estranjeiro no Kooperasaun (MNEK), Bendito Freitas.
Enkontru ne’e ko’alia kona-ba serbisu Conselho de Imprensa nian liu-liu iha Área Kooperasaun Institusionál iha Nível Institusionál hanesan Southeast Asian Press Council-Network (SEAPC-Net) iha ne’ebé Timor-Leste mós nu’udar fundadór ba organizasaun Rede Conselho de Imprensa ne’e rasik.
Iha enkontru, Conselho de Imprensa husu apoiu ba MNEK atu fasilita CI hodi bele halo espansaun ba nasaun membru ASEAN nian hodi komprende didi’ak lala’ok serbisu SEAPC-Net nian, inklui mós oinsá maka bele konvense Conselho de Imprensa no Asosiasaun Jornalista sira iha rejiaun hodi bele hola parte iha organizasaun SEAPC-Net.
Southeast Asian Press Council-Network (SEAPC-Net) estabelese iha loron 4 dezembru 2019, iha Salaun Enkontru Hotel Santika, Nusa Dua, Bali, Indonézia, ho membru organizasaun haat mak hanesan Conselho de Imprensa de Timor-Leste (CITL), Dewan Pers Indonesia (DPI), Myanmar Press Council (MPC) no National Press Council of Thailand.
Southeast Asia Press Council Network (SEAPC-Net) nia papél prinsipal maka oinsá bele promove Liberdade Imprensa no Liberdade Espresaun iha reziaun Sudeste Aziátiku, inklui halo advokasia no kapasitasaun ba mídia ho jornalista sira. (CI)