Dili – Conselho de Imprensa de Timor-Leste (CI), tersa-feira, 10 dezembru 2024, atribui tan títulu Profesional ba jornalista na’in 8 husi mídia nasional.
Jornalista na’in 8 mak hanesan Filomeno Martins (TATOLI.IP), João dos Santos Soare (RTTL,EP), Júlio Paixão da Costa (Media Labeh), Flávia Defari de Jesus (RTTL, EP), Januario da Assução (Diáriu Independente), Anibal do Espirito Santo (Media Labeh), Amandio Carlos Magno (RTTL, EP), Domingos Gomes Moniz (Diáriu Independente)
Jornalista na’in 8 ne’e kompleta ona sira nia estájiu profesional durante tinan fulan 18 iha instituisaun ne’ebé sira hakna’ar-án ba.
Hafoin remata estájiu profesional, Jornalista hirak ne’e partisipa ona kolókiu publiku durante semana 2, ikus liu tuir ezame kompeténsia husi Conselho de Imprensa hafoin hetan títlu jornalista profesional.
Haktuir iha lei Komunikasaun sosiál artigu 14 kona-ba asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.
Kompetensia Conselho de Imprensa nian ida maka Fó, halo foun, tahan no hasai tiha títulu profisionál jornalista nian. (CI)