Komemorasaun Tinan 50 trajédia Balibo 5 no Selebrasaun Tinan 3 Loron Nasional Liberdade Imprensa

Balibó – Conselho de Imprensa de Timor-Leste no Sekretáriu Estadu Komunikasaun Sosiál, Komemora Tinan 50 Trajédia Balibó 5 no Selebra Tinan 3 Loron Nasionál Liberdade Imprensa, hahú husi 13-16 Outubru 2025, iha Postu Administrativu Balibó, Munisípiu Bobonaro. Atividade komemorasaun Tinan 50 Trajédia Balibó 5 ho objetivu atu bele relebra hikas sakrifísiu jornalista sira nian nu’udar istória ne’ebé importante tebes iha Timor-Leste nia luta ba lia-loos no justísa hasoru invazór Indonézia nian. Selebrasaun Tinan 3 Loron Nasionál Liberdade Imprensa, mak oinsá jornalista sira bele hadomi sira nia profisaun jornalízmu, imprensa tenke livre hodi halaó nia kna’ar nu’udar kontrolu sosiál iha país demokrátiku ida ne’e, hodi bele dezenvolve nasaun ida ne’e rasik iha future ne’ebé di’ak liutan. Prezidente Repúblika, Jose ramos Horta mak ensera atividade Komemorasaun Tinan 50 Trajédia Balibó 5 no Selebra Tinan 3 Loron Nasionál Liberdade Imprensa. Partisipa iha eventu importante ne’e, Prokuradór Jerál da Repúblika ho nia Adjuntu, Vise Ministru Asuntu Parlamentár, Vise Ministru Obras Públika, Sekretáriu Estadu Komunikasaun Sosiál, Sekretáriu Estadu Veteranu, Provedór Direitu Umanu no Justísa inklui mós Adjuntu PDHJ, Prezidente CITL ho membru sira, Prezidente Autoridade Munisípiu Bobonaro, Administradór Postu Administrativu Balibó, PNTL, F-FDTL, Família Matebian Jornalisra Balibó 5, Jornalista, Xefe Redasaun, Jestór Rádiu Komunidade, Asosiasaun Jornalista, Reprezentante Liñas Ministeriais Munisípiu Bobonaro no Nasionál, inklui mós parseiru estratéjiku sira CITL no SECOMS nian.