Dili – Prezidente no Membru Conselho de Imprensa de Timor-Leste (CITL) terseiru mandatu ba períodu 2025-2029, simu pose husi prezidente Parlamentu Nasional, Maria Fernanda Lay, iha salaun konferénsia Parlamentu Nasionál, iha loron 26 Juñu 2025.
Estrutura Conselho de Imprensa na’in lima ne’ebé simu pose mak hanesan António M. C. M. Mali (Prezidente), Benevides Correia Barros (Membru), Isabel M. F. de Jesus (Membru), Joaquim de Fátima Coutinho (Membru) no Suzana Bui Rai Carlota Cardoso (Membru).
Tuir lei komunikasaun sosiál iha artigu 45 kona-ba kompozisaun haktuir Conselho de Imprensa kompostu hosi membru sira na’in lima, ne’ebé hili hanesan reprezentante na’in rua ne’ebé hili husi jornalista sira, reprezentante ida husi órgaun komunikasaun sosiál, no Sidadun na’in rua, matenek no iha esperiénsia profisionál ne’ebé kle’an liuliu kona-ba komunikasaun sosiál, husi sira na’in rua ne’e ida jurista, ne’ebé hatudu hosi Parlamentu Nasionál.
Iha artigu 46 lei komunikasaun sosiál haktuir mandatu kompozisaun Conselho de Imprensa ho durasaun tinan haat no bele renova dala ida de’it.
Konselleiru Benevides Correia Barros no Konselleira Isabel Mari Fernandes de Jesus renumeia husi Parlamentu Nasional nu’udar péritu iha área jurídiku no komunikasaun sosiál. Entretantu Jornalista sira hili konselleiru António M. C. M. Mali no Joaquim de Fátima Coutinho nu’udar sira nia reprezentante, entretantu órgaun komunikasaun sosiál sira hili konselleira Suzana Bui Rai Carlota Cardoso. (CI)