Díli – Conselho de Imprensa de Timor-Leste (CI) realiza enkontru dahuluk membru eleitu Conselho de Imprensa mandate datolu ba tinan haat, períodu 2025 – 2029, iha salaun enkontru Conselho de Imprensa, Quintal Boot, Dili.
Enkontru dahuluk ne’e ho ajenda únika maka membru eleitu na’in lima refere hili reprezentante ida ba eleze funsaun nu’udar Prezidente Conselho de Imprensa ba mandatu datolu, períodu 2025 – 2029.
Liuhusi eleisaun, membru Konsellu sira eleze konfiansa ba Konselleiru António M. C. M. Mali hodi assume kargu nu’udar Prezidente Conselho de Imprensa de Timor-Leste (CI), ba Períodu tinan 2025 – 2029 ba mandatu datolu.
Konsellu Imprensa nu’udar pesóa koletiva ida direitu públiku nian, ho natureza entidade administrativa independente, hetan autonomia administrativa, finanseira no ho patrimóniu rasik
Haktuir iha estatutu Conselho de Imprensa, artigu 23 kona-ba eleisaun prezidente Conselho de Imprensa dehan:
1. To’o loron lima hafoin liu tiha eleisaun ba reprezentante sira jornalista no órgaun sira komunikasaun sosiál nian ka liu tiha Parlamentu Nasionál foti membru sira tuir alínea c) númeru 1, artigu 45.o hosi Lei Komunikasaun Sosiál nian, membru na’in lima Konsellu Imprensa nian sei hala’o sorumutuk ida hodi hili prezidente ida entre sira.
2. Konsidera sai Prezidente ida ne’ebé maka hetan númeru votu barakliu.
3. Bainhira hetan empate maka sei hala’o votasaun hikas fali ba kandidatu sira na’in rua ne’ebé hetan númeru votu barakliu.
4. Rezultadu eleisaun nian ne’e sei fó-hatene ba Parlamentu Nasionál to’o loron lima hafoin liu tiha eleisaun.
5. Bainhira kargu Prezidente nian laiha ema ida maka okupa maka sei hili entre membru na’in hira ne’e ida ne’ebé katuas liu hodi sai Prezidente interinu to’o hili hikas fali ida ne’ebé sai Prezidente definitivu.
6. Eleisaun ba Prezidente foun sei hala’o tuir regra hirak ne’ebé temi iha númeru sira 2 no 3 to’o loron lima hafoin fó-sai tiha membru foun Konsellu Imprensa nian ne’ebé hili tuir regra sira ne’ebé temi iha númeru 4 hosi artigu 20.o nian.
Iha artigu 24, estatutu Conselho de Imprensa kona-ba kompeténsia sira Prezidente nian maka:
1. Prezidente Konsellu Imprensa ninia kompeténsia maka:
a) Konvoka no prezide sorumutuk sira Konsellu Imprensa nian;
b) Koordena atividade sira Konsellu Imprensa nian no garante atu kumpri sira nia deliberasaun sira;
c) Diriji atividade Diretór Ezekutivu nian, hodi garante jestaun di’ak ba servisu no rekursu finanseiru sira Konsellu Imprensa nian;
d) Fahe área sira intervensaun ne’ebé prefere ba membru oioin Konsellu Imprensa nian;
e) Garante relasaun Konsellu Imprensa nian ho entidade sira seluk;
f) Reprezenta Konsellu Imprensa, liuliu, iha atividade ofisiál sira, ba-iha relasaun ho autoridade no tribunál sira.
2. Bainhira Prezidente latama servisu ka tanba iha impedimentu ruma maka sei substitui hosi membru Konsellu Imprensa nian ida ne’ebé nia hatudu ka bainhira la hatudu maka membru ida ne’ebé katuas liu maka sai Prezidente ninia substitutu. (CI)