Díli – Conselho de Imprensa de Timor-Leste (CI) realiza ona konferénsia Internasionál The Dili Dialogue Forum (DDF) tinan 2024 ho tema “Papel Mídia Hasoru Krisi Ambientál”, iha loron 10 Maiu 2024, iha salaun Multiusos, GMN, Bebora, Díli.
Tinan ida ne’e, Iha ambitu komemorasaun loron Mundiál Liberdade Imprensa ba dala 31 iha tinan ne’e iha Chile ho tema “A Press For The Planet: Journalism In The Face Of Environmental Crisis” ka Imprensa Ba Planeta: Jornalizmu Iha Krisi Ambiental Nia Oin” liga ho tema mundiál ne’e Conselho de Imprensa de Timor-Leste tuir kontekstu Timor-Leste ohin loron desidi topiku DDF ba tinan ne’e mak “Papel Mídia Hasoru Krisi Ambientál”.
Asuntu Importante atu diskuti iha DDF tinan 2024 mak hanesan: Jornalista no Mídia iha knar atu aumenta públiku ninia konsiensia kona-ba importansia hosi saude ambiental, Foti informasaun kona-ba risku seriu hosi polusaun kausa hosi projektu infrastrutura boot inklui oinsa sa nudar mediador, Halo funsaun hodi kontrola Governu nia politika ba salva ambiente tuir lei no tratadu Internasionál ne’ebé TL adopta, no Forma opiniaun publiku no fo solusaun inovatifu ba problema no risku ambientál agora no ba futuru.
Iha sesaun primeiru Konferénsia Internasionál Dili Dialogue Forum, oradór internasionál sira hodi fahe esperiensia kona-ba “Mekanízmu Global no Esperiénsia Kada Nasaun Membru SEAPC-Net Oinsá Serbisu Mídia Hodi Asegura Ambiente iha Timor-Leste & Sudueste Aziátiku”.
Oradór internasional sira maka hanesan Associate Project Officer UNESCO Jakarta, Hesthi Murti, Membru Dewan Pers Indonesia, Asep Setiawan, Membru Nasional Thailand Press Councill (NTPC), Anucha Charoenpo, Kompas Media, Jakarta-Indonesia, Aloysius Budi Kurniawan, no Prezidente Conselho de Imprensa de Timor-Leste (CI), Otelio Ote.
Iha sesaun segundu Konferénsia Internasionál Dili Dialogue Forum, oradór nasionál sira maka ko’alia kona-ba matéria espesifiku sira ligadu ho tema sentral DDF 2024 “Papel Mídia Hasoru Krisi Ambientál”.
Oradór nasionál sira maka hanesan Embaixadór Boa Vontade Meiu Ambiente no Kultura, Ego Lemos ko’alia kona-ba “Promosaun no Advokasia ba Meiu Ambiente ne’ebé Sustentável”, Prezidente AJTL, Zevonia Maria Vieira ko’alia kona-ba “Importánsia Kobertura Mídia ba Asuntu Ambientál”.
Aleinde ne’e, Na’in ba Mídia GMN-Group, Jorge M. de Araujo Serrano ko’alia kona-ba “Polítika Mídia ba Kobertura Asuntu Ambientál”, Prezidente Autoridade Nasionál Lisensiamentu Ambientál, Institutu Públiku (ANLA.IP), António Lelo Taci, sekretáriu Estadu Komunikasaun Sosiál (SECOMS), Expedito Loro Dias Ximenes ko’alia kona-ba “Polítika Governu ba Kapasitasaun Jornalista no Mídia Liga ho Asuntu Ambientál”.
Partisipante sira iha eventu DDF hamutuk ema na’in 250 kompostu husi Jornalista, Orgaun no meius komunikasaun sosiál, Asosiasaun jornalista (AJTL, TLPU, ARKTL no UPJETL), Representante Jestor Radio Komunidade husi Munisipiu, Parseiru estratéjiku sira no Ministeriu hirak ne’ebé tutela ba asuntus ambiente, Ensinu suprior (UNTL, UNITAL, UNPAZ, UNDIL), ONG no agensia Internasional, Instituto publiku, Korpu diplomatik no seluk tan.
Eventu DDF ofisialmente abertura husi S. E Presidente Parlamentu Nasional Maria Fernanda Lay no ensera hosi S. E Sekretariu Estadu Komunikasaun Sosiál, Expedito Loro Dias Ximenes. (CI)