Ba dahuluk hakarak hato’o ita-nia agradesimentu ba Na’i Maromak tanba nia Bensuan no akompañamentu, ita bele hasoru malu iha fatin ne’e ho kondisaun di’ak.
Timor-Leste, nasaun foun ida ne’ebé loron hirak tuir mai, tama ona ba idade 22. Ita sei selebra aniversáriu Restaurasaun Independénsia iha loron 20, fulan Maiu tinan 2024.
Nu’udar nasaun ne’ebé iha prosesu rekonstrusaun, hatudu progresu signifikante iha setór dezenvolvimentu hotu, inklui dezenvolvimentu Mídia ka meius Komunikasaun Sosiál.
Nu’udar ita hatene, nasaun ne’ebé mak mídia iha no dezenvolve aan ho di’ak, hatudu sinal nasaun ne’e nasaun demokrátiku duni. Sinal seluk, mak nasaun ne’e nia Parlamentu Nasionál funsiona ho di’ak no realiza eleisaun sira ho susesu.
Iha aspetu meiu Komunikasaun Sosial, Timor-Leste hatudu nia progresu pozitivu. Atualmente, ita iha Meiu Komunikasaun Sosiál (imprimi, eletrónika no internete ka online notisia) hamutuk 47. Husi plataforma tolu ne’e, mídia online iha 21, barakliu kompara ho jornal 4, Televizaun 4 no Rádiu iha 18, inklui ona Rádiu Komunidade sira.
Hare ba númeru jornalista, bazeia ba dadus iha Conselho de Imprensa agora ita iha ema 300 resin mak jornalista ativu, husi ema 400 resin mak hetan ona karteira profesionál jornalista.
Conselho de Imprensa, nu’udar instituisaun Estadu Independente, no asumi kna’ar ka kompeténsia atu garantia asesu informasaun, liberdade espresaun, liberdade imprensa, independensia editoriál, eleva kapasidade téknika, profisionál no intelektuál jornalista, kontinua dezenvolve komunikasaun no kooperasaun ho entidade hotu, atu fasilita formasaun no forma kapasitasaun seluk tan, atu mídia funsiona ho di’ak no iha kualidade.
Dili Dialogue Forum, ne’ebé ohin lori ita hotu mai hamutuk iha fatin kmanek ne’e, parte ida husi maneira sira, atu investe kuoñesimentu, eleva kapasidade inteltual ita hotu nian.
Programa Dili Dialogue Forum ne’ebé hahú kedas iha tinan 2018, mai husi rezultadu semináriu internasionál ida iha Dili tinan 2017, ko’alia kona-ba liberdade imprensa, no liderdade esprezaun iha Rejiaun Sudueste Aziátiku no Pasífiku.
Kada tinan, realiza Dili Dialogue Forum ho Tema Diferente. Tinan ne’e, ita hili tema “Papel Mídia Hasoru Krize Ambiental”. Tema ne’e, nu’udar kontinuasaun husi tema Loron Mundiál Liberdade Imprensa tinan 2024, kona – ba “Imprensa ba Planeta: Jornalizmu iha krize Ambiental nia oin.”
Nu’udar ita hotu hatene, Timor-Leste mós enfrenta krize ambiental. Ai-oan menus tanba tradisaun no kultura uza ai ba sunu, halo uma, tradisaun taa ai halo to’os no seluk tan.
Ita hatene nia impaktu ba planeta no ba umanu. Maibé, mídia no jornalita la tau iha kestaun ka prioridade ba kobertura no publikasaun notísia, atu sensabiliza ba públiku ka mak kaer desizaun polítika sira, kona-ba benefísiu husi ambiente matak no nia impaktu negativu bainhira planeta sem ambiente matak.
Sesaun ida husi Dili Dialogue Forum ida ne’e, ita sei rona esperiénsia husi jornalista Indonesia ida husi Mídia Kompas, kona - ba importánsia husi jornalízmu ambiental.
Nomós husi Ambasador Boa Vontade Meiu Ambiente, Sr Ego Lemos, Pezidente Autoridade Nasional Lisensa Ambiental, I.P Sr. Antonio Lelo Tasi no oradór sira seluk tan.
Espera liuhusi tema Ambiental iha Dili Dialogue Forum ida ne’e, bele hasa’e ita hotu nia koñesimentu no sensibilidade ba Ambiente.
Ba futuru, Conselho de Imprensa mós sei esforsu hamutuk ho parseiru sira atu produz Manual Reportajen Ambiental atu komunidade mídia uza nu’udar matadalan ba kobertura no prosesu produsaun notísia Ambiental. Ita hamutuk salva Planeta husi ita – nia atensaun ba dizaminasaun informasaun kona - ba Ambiental.
Senhores/Senhoras
Loron hitu liuba, ita rona anúnsiu husi Reporter Sem Fronteira (RSF) kona – ba Ranking Liberdade Imprensa, ne’ebé hatudu Timor-leste nia ranking tun husi Top 10 ba Top 20.
Ita rekoñese, kahur ho sentimentu triste to’o hatudu malu se mak loos se mak sala. Maibé, ita presiza mós konsiente katak, ida-ne’e mak evolusaun husi liberdade imprensa.
Horseik loraik ami iha enkontru nasaun membru Rede Conselho de Imprensa Sudueste Aziátiku ka South East Asia Press Council Network (SEAPC-net), kuaze oras haat, hare mós asuntu ranking liberdade imprensa ne’e.
Nasaun membru SEAPC-Net konsidera Reporter Sem Fronteira (RSF) mós nu’udar Organizasaun Naun Governamental ida, ne’ebé iha sira-nia avaliasaun, dalaruma simu de’it informasaun husi ema ida ka grupu ida, kona-ba dezenvolvimentu liberdade imprensa iha nasaun sira.
Nune’e, labele uza RSF nu’udar fonte úniku, iha avaliasaun liberdade imprensa, tanba iha organizasaun seluk tan ne’ebé mós halo avaliasaun ho aprosimasaun di’ak liu.
Importante ba ita, kontinua iha espíritu luta atu sidadaun hotu iha asesu ba informasaun, iha liberdade espresaun, no iha liberdade imprensa. liberdade imprensa tenki ekilibru ho kualidade produtu mídia.
Ejiji ba Estadu, Governu no Parlamentu Nasionál atu hare produtu lejislasaun sira, atu labele taka dalan ba liderdade asesu informasaun no liberdade imprensa.
Tanba liberdade imprensa mós sai sasukat importante ba ranking demokrasia iha kada nasaun.
Ikus mai, ha’u konvida ita hotu atu aprende husi frakeza pasadu, hadi’a aan ohin kedas no hakat ba oin nafatin, ba mídia ne’ebé ho kualidade di’ak no mídia independente, ba povu nia liberdade opiniaun di’ak no ba Timor-Leste nia demokrasia di’ak, di’ak iha rejiaun ne’e no iha mundu.