𝐃𝐞𝐤𝐥𝐚𝐫𝐚𝐬𝐚𝐮𝐧 𝐂𝐨𝐧𝐬𝐞𝐥𝐡𝐨 𝐝𝐞 𝐈𝐦𝐩𝐫𝐞𝐧𝐬𝐚 𝐑𝐞𝐥𝐚𝐬𝐢𝐨𝐧𝐚 𝐡𝐨 𝐎𝐟𝐞𝐧𝐬𝐚 𝐈𝐧𝐭𝐞𝐠𝐫𝐢𝐝𝐚𝐝𝐞 𝐅í𝐳𝐢𝐤𝐚 𝐇𝐚𝐬𝐨𝐫𝐮 𝐉𝐨𝐫𝐧𝐚𝐥𝐢𝐬𝐭𝐚 𝐢𝐡𝐚 𝐊𝐚𝐦𝐩𝐮𝐬 𝐔𝐍𝐃𝐈𝐋

Dili, 23 Outubru 2025 - Conselho de Imprensa de Timor-Leste (CITL) espresa preokupasaun no lamentasaun profunda ba insidente ne’ebé akontese iha resintu Universidade Dili hasoru jornalista ne’ebé hala’o knaar atu halo kobertura ba konferénsia imprensa relasiona ho asuntu sensitivu balu ne’ebé alegadamente envolve pesoal dosente ida iha Universidade Dili. Hakarak hato’o ba públiku katak mídia nu’udar pilar dahaat ne’ebé kontribui ba haburas demokrasia hodi promove transparénsia, defende lia-loos, justisa no sai lian ba ema lian laek sira. Nune’e, husu ba públiku atu respeita knaar media no jornalista nian hodi kria ambiente ne’ebé livre no seguru atu mídia bele hala’o sira nia funsaun ho di’ak hodi bele serbi públiku ho informasaun ne’ebé loos no kredivel. Hahalok impede knaar jornalista nian la’ós de’it viola Liberdade Imprensa no Liberdade Espresaun maibé mós viola públiku nia direitu atu hetan informasaun, direitu ne’ebé konsagra iha ita-nia konstituisaun RDTL. Dala ida tan, Conselho de Imprensa espresa lamentasaun ne’ebé kle’an ba aktu ofensa integridade fízika simples hodi impede ona jornalista sira ezerse sira-nia funsaun iha espasu públiku, ho pozisaun sira tuir mai ne’e. 1. Apela ba instituisaun ensinu superiór no institusaun hotu-hotu atu garante espasu ne’ebé seguru no livre atu jornalista sira bele ezerse sira-nia funsaun ho livre. 2. Enkoraja jornalista no mídia sira hotu atu kontinua hala’o knaar ho profesionál, nakonu ho responsabilidade tuir Kódigu Étika Jornalista nian. 3. Apela ba Órgaun Komunikasaun Sosiál sira wainhira emprega pesoal ruma sai jornalista iha ita-boot sira-nia mídia, mínimu liu tenke iha kartaun estajiáriu atu asegura jornalista sira-nia direitu wainhira ezerse funsaun jornalístika nian iha terenu. 4. Reafirma kompromisu Conselho de Imprensa nian atu kontinua defende Liberdade Imprensa, Liberdade Espresaun hodi garante públiku asesu informasaun ne’ebé kredivel no firmi defende mídia no jornalista iha situasaun ameasa nia laran. 5. Conselho de Imprensa louva asosiasaun jornalista sira ne’ebé rápidamente responde lalais kedas ba insidente refere ho deklarasaun no pozisaun ne’ebé eziji responsabilidade husi autór sira ne’ebé komete ofensa integridade fízika hasoru jornalista SAPNews.TL iha Kampus UNDIL. Espera insidente refere sei la akontese tan iha loron oin mai.