Jakarta, 30 dezembru 2025 - Prezidente Conselho de Imprensa de Timor-Leste (CITL) Antonio Maria da C. Moniz Mali ho Membru CI, Benevides C. Barros no Isabel M. F. de Jesus, hala’o vizita ofisiál ida ba studio Trans-Tv nian, iha Jl.Kapten Tendean Kav.12-14A Kel. Mampang Prapatan Jakarta Selatan (Gedung Transmedia).
Iha vizita ne’e, delegasaun husi CITL hetan esplikasaun husi Wakil Pemred CNBC Muhammad Ghufron ho ekipa Trans Tv, kona ba greilla programasaun Trans TV nian, espesifikamente iha prosesu produzaun programa, sistema transmisaun nian no estratéjia media ba utilizasaun ekipamentu inovativu sira tuir dezenvolvimentu era dijitál. Iha vizita ne’e CITL halo mos diskusaun ba planu kooperasaun ho Trans TV, iha futuru atu halo kapasitasaun ba media no jornalista sira, kona-ba sistema servisu no padraun profisionál servisu televizivu nian.