Jornalista Na’in 20 Partisipa Kolókiu Públiku Tinan 2025

Dili – Conselho de Imprensa de Timor-Leste (CITL) realiza hikas Kolókiu Públiku tinan 2025 ba jornalista estajiáriu sira, iha salaun enkontru CITL, Quintal Boot, Dili, hahú husi loron 17 – 25 Novembru 2025. Matéria ba kolókiu públiku mak hanesan Étika Jornalízmu no Element 10 Jornalízmu nian, Jestaun Editoriál, Papel Mídia Hodi Hari Demokrasia, Papel Mídia Hodi Prezerva Memória Pasadu, Lei KomSos no Kódigu Penál (artigu 285), Jornalízmu ho Prespetiva Jenéru, Papel Mídia hodi Promove Direitu Umanu, Jornalízmu Ambientál no Matadalan Mídia Sosiál, Jornalízmu Inkluzivu (Etnisidade, Relijiaun, LGBT), Jornalízmu Inkluzivu (Defisiénsia), Jornalízmu Paz. Formadór sira ba Kolókiu Públiku ida ne’e mak hanesan Alberico da Costa Junior, Francisco Belo Simões da Costa, Antonio Maria da Conceição Moniz Mali, Hugo Maria Fernandes, Zenilton Zeneves, Nugroho Katjasungkana, Rigoberto Monteiro, Sidonia Fernandes, Caetano Alves, Floriana da Silva, no Maria Bibel. Partesipantes ba etapa ida ne’e, jornalista hamutuk na’in 20 husi órgaun komunikasaun sosiál iha nasionál mak hanesan mídia imprimi, Online, Rádiu no Televizaun. Haktuir iha lei komunikasaun sosiál artigu 13 kona-ba hala’o profisaun iha Alinea 1 haktuir kondisaun atu hala’o profisaun jornalista nian maka abilitasaun ho nia títlu rasik hanaran karteira professional, ne’ebé Conselho de Imprensa mak fó no renova. Iha artigu 14 kona-ba asesu ba profisaun haktuir Asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.