𝐌𝐢𝐬𝐚 𝐑𝐞𝐪𝐮𝐞𝐦 𝐛𝐚 𝐉𝐨𝐫𝐧𝐚𝐥𝐢𝐬𝐭𝐚 𝐁𝐚𝐥𝐢𝐛ó 𝟓 𝐍𝐨𝐦ó𝐬 𝐉𝐨𝐫𝐧𝐚𝐥𝐢𝐬𝐭𝐚 𝐇𝐨𝐭𝐮 𝐍𝐞’𝐞𝐛é 𝐌𝐚𝐭𝐞 𝐢𝐡𝐚 𝐓𝐢𝐦𝐨𝐫-𝐋𝐞𝐬𝐭𝐞

Balibó – iha ámbitu Komemorasaun Tinan 50 Trajédia Balibó 5 no Selebrasaun Tinan 3 Loron Nasional Liberdade Imprensa, Conselho de Imprensa de Timor-Leste (CITL) nomós Sekretária Estadu Komunikasaun Sosiál (SEKOMS), husu misa requem ida ba jornalista na’in 5 ne’ebé mate iha Balibó iha loron 16 Outubru 1975 nomós jornalista hotu ne’ebé mate iha Timor-Leste. Atividade Misa Requem ne’e hala’o iha loron 16 Outubru 2025, prezide husi Padre Pároku Parokia Balibó no partisipa husi Membru Conselho de Imprensa, Diretór Ezekutivu, Kargu Xefia no funsionáriu CITL, Jornalista no Responsável Órgaun no Meiu Komunikasaun Sosiál sira, Parseiru estratéjiku CITL no SEKOMS nian, inklui mós komunidade Balibó. Jornalista na’in 5 ne’ebé mate iha loron 16 Outubru 1975 iha Balibó mak hanesan Gary Cunningham, Tony Stewart, Malcolm Rennie, Brian Peters no Greg Shackleton. Aleinde ne’e, iha mós jornalista na’in 6 seluk ne’ebé mate iha prosesu luta Timor-leste nian ba ukun rasik-án mak hanesan Kamal Bin Ahmed Bamadhaj, Sander Thoenes, Agus Mulyawan, Roger East, Bernardino Joaquim Afonso Guterres ”Berekai”, Francisco Borja da Costa.