Dili – Conselho de Imprensa de Timor-Leste (CI) kontinua realiza Kolókiu Públiku ba jornalista Estájiu Karteira Profisionál, ho objetivu atu hakle’an partisipantes sira nia abilidade iha área jornalízmu.
Kolókiu Públiku tinan 2025 realiza iha salaun enkontru Conselho de Imprensa, Quintal Boot, Dili, hahú husi 4 – 12 Marsu 2025, hetan partisipasaun husi jornalista hamutuk na’in 15 husi mídia privadu sira hanesan Hatutan.com, GMN, SapNews.tl, Radiu Labeh, no Diáriu Independente, inklui mós mídia statal-Tatoli.IP.
Oradór ba kolókiu públiku ne’e maka hanesan Diretór DADM, Alberico da Costa Junior, Konselleiru Francisco Simões Belo da Costa, Prezidente Conselho de Imprensa, Otelio Ote, Diretór CNC, Hugo Maria Fernandes, Diretór DRAF, Zenilton Zeneves, Peskizadór Nugroho Katjasungkana, Adjunto Provedór dos Direitos Humanos e Justiça, Rigoberto Monteiru, Tekniku Superiór CI, Caetano Alves, RHTO, Floriana da Silva no Tékniku Superiór, Maria Bibel.
Materia sir aba kolókiu públiku mak hanesan étika jornalízmu no element 10 jornalízmu nian, jestaun editorial, papél mídia hodi hari’I demokrasia, papel mídia hodi prezerva memoria pasadu, lei komunikasaun sosiál no kódigu penal, jornalízmu ho prespetiva jéneru, papél mídia hodi promove direitu umanu, jornalízmu ambientál no matadalan mídia sosiál, jornalízmu inkluzivu (etnisidade, relijiaun, LGBT), jornalízmu inkluzivu (difisiensia), no jornalízmu ba paz.
Kolókiu Públiku nu’udar espasu esensiál no mekanizmu importante ida atu esplika modul no materia oioin kona-ba jornalizmu no papel mídia nian hodi kontribui ba prosesu demokratizasaun iha rai laran.
Objetivu seluk husi Kolókiu Públiku maka atu introdus materia ka modul sira ba estajiáriu, hakle’an no hametin abilidade jornalízmu estajiáriu sira nian nomós hametin relasaun entre estajiáriu sira ho Conselho de Imprensa no kanál mídia sira.