Balibo, 16 Outubru 2024 – Conselho de Imprensa de Timor-Leste (CI) hamutuk ho Governu, komunidade mídia no parseiru estratéjiku sira, autoridade lokál Munisípiu Bobonaro no autoridade komunitáriu Balibo komemora loron nasionál liberdade imprensa ba daruak.
Selebrasaun loron nasionál liberdade imprensa ba daruak realiza ho tema “Atmosfera Liberdade Imprensa iha Nasaun Demokrátiku”, iha Postu Administrativu Balibo, Munisípiu Bobonaro, hahu husi loron 14-16 Outubru 2024.
Partisipa iha atividade topu ba komemorasaun Loron Nasional Liberdade Imprensa ba Daruak maka hanesan Vise Ministru Asuntu Parlamentar, Aderito Hugo da Costa, Prezidente Conselho de Imprensa, Otelio Ote ho nia Membru na’in haat, Komandante PNTL Munisípiu Bobonaro, Agostinho Gomes, Diretór sira husi parseiru estratéjiku CI nian, Diretór Mídia, Xefe Redasaun, Editor no Jornalista sira, Reprezentante PAM Bobonaro, Reprezentante Administradór Postu Balibo, Autoridade komunitáriu Balibo nomos komunidade Balibo.
Iha biban ne’e, CI atribui tan prémiu Conselho de Imprensa hamutuk haat ba jornalista no mídia sira ne’ebé konkore iha kompetisaun prémiu Conselho de Imprensa.
Manán na’in ba prémiu hirak ne’e maka hanesan, Prémiu Conselho de Imprensa manan husi mídia online Hatutan.com, Premiu Adelino Gomes manan husi Jornalista mídia Online Diligente, Eduardo Soares, Premiu Greg Shackleton manan husi Jornalista RTTL, EP, Constancio Vieira, Premiu Francisco Borja da Costa manan husi Jornalista Diáriu Independente, Januario da Assunção.
Aleinde ne’e, iha 15 Outubru, Conselho de Imprensa hamutuk ho Jornalista, Editór, Xefe Redasaun, Na’in ba Mídia, Asosiasaun Jornalista (AJTL, TLPU, UPJTL, ARKTL), realiza mós forum Nasional Editorial ho tema “Papel Editór Hodi Asegura Independénsia Editoriál”.
Oradór ba Forum Nasionál Editorial maka Konselleiru Benevides Correia Barros no Akademista Armindo Moniz Amaral. Partisipa iha Forum Nasionál Editorial ne’e, Prezidene Conselho de Imprensa, Autoridade Postu Balibo, PNTL Eskuadra Balibo, Membru Conselho de Imprensa sira, Jornalista husi Mídia Indonézia, Xefe Redasaun, Editór no Jornalista nasionál sira, parseiru estratéjiku sira.
Iha loron 14 Outubru 2024, Conselho de Imprensa serbisu hamutuk ho autoridade postu administrativu Balibo no autoridade Munisípiu Bobonaro hodi realiza feira produtu lokál no espozisaun foto jornalízmu.
Feira produtu lokál partisipa husi komunidade sira ne’ebé lokaliza iha postu Balibo hamutuk 10 kompostu husi hahan tradisionál sira nomós tais.
Iha loron 16 Outubru 2024, CI hamutuk ho Vise Ministru Asuntu Parlamentar, Autoridade Munisípiu Bobonaro, Autoridade Postu Balibo, Komunidade sira, Jornalista, Editór, Xefe Redasaun, Asosiasaun Jornalista nomos jornalista sira husi mídia indonézia partisipa iha misa requem no kari aifunan ba fatin mate Jornalista Balibo V.
Jornalista na’in lima ne’ebé mate, mai hosi televizaun kanál 7 no kanál 9 maka hanesan, Greg Shackleton (29), Tony Stewart (21), sira na’in rua ne’e mai hosi Australia no serbisu hamutuk ho Gary Cunninghan (27), hosi Nova Zelandia ne’ebé serbisu ba estasaun televizaun kanál 7 iha Melbourne. Entretantu, Briam Peters (26) no Malcolm Rennie (29), sira na’in rua husi Inglaterra no serbisu ba estasaun televizaun kanál 9 ne’ebé sentru iha Sydney. (CI)