Conselho de Imprensa Pronúnsia Rezultadu Levantamentu ba Intervensaun SECOMS iha Sala Redasaun RTTL, EP

Konferénsia Imprensa - Maluk sira, Conselho de Imprensa de Timor-Leste (CI), nu’udar entidade administrativa independente ne’ebé atua ba-iha setór komunikasaun sosiál nian, defini tiha ona iha Lei Komunikasaun Sosiál nu. 5/2014, loron 19, fulan novembru, no Dekretu-Lei nu. 25/2015, ho kna’ar atu asegura liberdade imprensa no liberdade espresaun.

Hakat husi báze legál ne’e iha CI nia existénsia hahú fulan Maiu tinan 2016 to’o agora ne’e kuntinua asegura servisu jornalízmu no mídia inklui hamrik metin ba defende no asegura públiku nia direitu atu hetan notísia ne’ebé loos, momoos no kualidade tuir lei komunikasaun sosiál no regulamentu Conselho de Imprensa nian.

Hanesan ita hotu hatene ona iha fulan hirak liu-ba mosu notísia iha mídia balun ne’ebé deskonfia intervensaun SECOMS nian iha sala redasaun RTTL, EP Liga ho notísia kona-ba Primeiru Ministru Xanana Gusmão ne’ebé la kohi kaer liman ho membru Governu sira wainhira fila hosi Swiss, iha loron 23 fulan Abril tinan ne’e.

Bazeia ba informasaun ne’e maka CI estabelese nia komisaun ida hodi buka hatene loloos faktus kona-ba informasaun ne’e. Komisaun hahú nia servisu durante fulan juñu no jullu hodi buka informasaun direta husi entidade oi-oin inklui jornalista RTTL, EP. Liu hosi dadus ne’ebé hetan komisaun konklui ho faktus sira tuir mai;

1. SECOMS ba duni iha sala redasaun RTTL, EP nian iha loron 23 fulan Abril tinan 2024 akompaña husi Prezidente Conselho Administrasaun RTTL, EP.
2. SECOMS rasik wainhira partisipa nu’udar oradór iha the DILI DIALOGUE FORUM rekoñese katak ba duni sala redasaun RTTL, EP.
3. Konfirma katak SECOMS halo duni intervensaun ba sala redasaun RTTL, EP nian hodi muda konteúdu notísia ho títulu Primeiru Ministru Lakohi kaer liman ho membru Governu wainhira Fila hikas husi Swiss to’o Dili.

Bazeia ba faktus hirak ne’e, Conselho de Imprensa hola pozisaun hanesan tuir mai ne’e:

1. kondena maka’as asaun intervensaun ne’e tanba, atetude ida ne’e kontra artigu 40 Konstituisaun RDTL pontu 2 ne’ebé dehan “LIBERDADE KO’ALIA NO INFORMASAUN NIAN LABELE HETAN LIMITASAUN HOSI SENSURA RUMA”.
2. Lamenta atetude ne’e tanba asaun ne’e bele kontribui ba hatun ranking liberdade imprensa Timor-Leste nian iha tinan hirak oin mai.
3. Conselho de Imprensa husu ba SECOMS atu hapara intervensaun hanesan ba redasaun mídia hotu iha Timor-Leste iha futuru hodi hametin no asegura liberdadae imprensa no liberdade espresaun
4. Conselho de Imprensa hato’o nia apresiasaun ba parte hutu inklui jornalista hirak ne’ebé kontribui ona informasaun hodi kompleta CI nia deskoberta sira kona-ba asuntu ne’e.
5. Enkoraja mídia no redasaun hotu atu hato’o informasaun ba CI wainhira hetan intervensaun hosi see de’it ba sala redasaun sira.
6. Rezultadu levantamentu ne’e sei submete ba entidade hirak ne’ebé durante ne’e defende no promove liberdade imprensa hanesan Prezidente Repúblika, Parlamentu Nasionál, PDHJ, Asosiasaun Jornalista sira no sosiedade sivil
7. Sei submete mós Rezultadu levantamentu ne’e ba SECOMS nu’udar referénsia.

"Remata"