Díli - Conselho de Imprensa de Timor-Leste (CI) realiza hikas sensibilizasaun matadalan jornalízmu inkluzivu ba períodu daruak, hahú 12-14 Agostu 2024, iha salaun enkontru CI, Quintal Boot, Dili.
Iha sesaun abertura, Diretór Ezekutivu Conselho de Imprensa de Timor-Leste (CI), Antonio Dias hateten katak “Jornalista ne’ebé iha perspetiva inkluzivilidade maka halo notísia inkluzivu, laiha perspetiva inkluzivilidade labele halo notísia inkluzivu, tanba ne’e mak halibur ita-boot sira iha ne’e ho hanoin ida katak ita boot sira sei sai jornalista ida ne’ebé ho perspetiva nakloke ba diversidade, igualdade, hodi defende sira marjinalizadu, minoritáriu iha ita nia rai. Notísia inkluzivu la to’o de’it ho halo balansu maibé importante liu mak halo edukasaun atu ema la marjinaliza ema ne’ebé marjinalizadu tiha ona.”
Jornalista Hatutan, Zita Menezes hateten katak, “Husi treinamentu ne’e hatudu mai ita katak LGBTQIA+ mós iha direitu hanesan ho ita, tanba menus informasaun hare sira hanesan ketak ida, ita kontribui bully ba sira, agradese ba treinamentu ida ne’e, espera katak treinamentu ne’e halo mos ba xefe redasaun atu sira fó importánsia ba asuntu ne’e.”
Nune’e mos ho Jornalista Independente, Agustino, mos husuba CI atu enkaixa mos parte seluk iha sensibilizasaun hanesan iha futuru, “Ida ne’e priviléjiu tebes ba ha’u, tanba treinamentu ne’e pertinente tebes ba servisu jornalista nian, haforsa liután di’ak liután kobertura liuliu ba asuntu ne’ebé ko’alia durante loron tolu ne’e, buat sira sai difikuldade mak durante laiha sensibilizasaun, foin CI mak halo ida ne’e ba jornalista sira, ha’u rekomenda ba oin kontinua ida ne’e bele mós halo kooperasaun ho entidade sira seluk hanesan iha area judisiáriu, lei atu nune’e ita bele hatene.
Sensibilizasaun ne’e loke husi Prezidente Conselho de Imprensa de Timor-Leste (CI), Otelio Ote, no partisipa husi Komunidade mídia hanesan jornalista husi Online, Jornál, Radio no Televizaun–hamutuk 10, feto 7 no mane 3, hola parte iha sensibilizasaun Matadalan Jornalizmu Inkluzivu. Sensibilizasaun hanesan halo ona iha 22-23 Maiu 2024 liu ba. (CI)