Dili, 16 Jullu 2024 - Ba dahuluk, mai ita Agradese ba Aman-Maromak, tanba nia Bensaun no protesaun ba ita hotu, ohin ita bele hasoru malu ho isin di’ak iha salaun simples ida-ne’e, husi Edifisiu Conselho de Imprensa de Timor-Leste.
Hanesan ita hotu hatene, ezistensia Conselho de Imprensa bazeia ba Lei Komunikasaun Sosiál Nu 05/2014. Baze husi Lei ne’e, mak estabelese Conselho de Imprensa liuhusi Dekretu Lei Númeru 25/2015.
Natureza Conselho de Imprensa nu’udar Órgaun Independente, iha aspetu Finanseiru no Administrativa. Iha lei mós fó kna’ar ida ba Conselho de Imprensa atu sai mediadór ba kazu sira ne’ebé relasiona ho produtu jornalístiku. Ho Mediasaun ne’ebé lidera husi Conselho de Imprensa, bele hakotu disputa produtu jornalístiku, nune’e prevene parte rua lori malu ba prosesu legál sira, antes ka depois de mediasaun.
Sua Exelénsia no konvidadu sira hotu,
Tinan hirak liuba, Jornalista no jestór mídia balun, obrigatóriu ba hatan iha Tribunal tanba ema ne’ebé mak sente la satisfas ho produtu jornalista, keixa direta ba Tribunal nu’udar kazu krimi. Kriminalizasaun ba produtu jornalístiku, kontra prinsípiu jerál jornalízmu ne’ebé buka hakerek kona-ba lialoos.
Nune’e, hafoin ezisténsia Conselho de Imprensa, hahú kedas ho advokasia ba Instituisaun relevante no importante sira, kona-ba labele krimininaliza jornalista no kazu produtu jornalístiku presiza rezolve liuhusi mekanizmu jornalístiku.
Dezde tinan 2017, iha Primeiru Mandatu Conselho de Imprensa halo advokasia kona-ba importánsia husi tau-matan ba prosesu rezolve produtu jornalístiku presiza bazeia ba prosesu ne’ebé hakerek iha Lei Media Nu 05/2014, mak liuhusi Direitu de Resposta, Direitu Retifikativu no Mediasaun iha Conselho de Imprensa.
Bainhira ema ida, grupu ka instituisaun ruma la konkorda ka la satisfas ho publikasaun ruma, inklui publikasaun retifikativu, bele hato’o keixa ba Conselho de Imprensa atu halo mediasaun entre parte rua.
Bainhira parte ida ka parte rua, la konkorda ho rezultadu mediasaun bele kontinua ba prosesu normál legál liuhusi autoridade legál sira iha Polísia, Prekuradoria no Tribunal.
Iha loron 6 fulan Marsu tinan ne’e, Conselho de Imprensa ho Ministériu Públiku hala’o enkontru ida ofisiál hodi halibur ideia no buka esforsu, atu realiza Memorandu Of Undenstanding ida, hodi ba futuru, instituisuan rua ne’e iha persepsaun ida de’it kona-ba oinsá prosesu no rezolve disputa produtu jornalístiku.
No nia finalidade mak ohin Conselho de Imprensa ho Ministériu Públiku liuhusi Prokuradór Jerál Repúblika, realiza asina Memorandu ida ne’e, atu hametin liu kumprimísiu kona-ba hametin no haburas liberdade imprensa, eleva profesionalízmu jornalista sira liuhusi formasaun iha aspetu termu legál no prosesu legál sira no hadi’a kualidade jornalístiku.
Lori Conselho de Imprensa nia naran, dala ida tan hakarak hato’o apresiasaun no agradesimentu ba Prokuradór Jerál Repúblika ho estrutura tomak no estrutura Conselho de Imprensa tomak, ne’ebé halo esforsu hotu, hodi realiza asina MoU ida ne’e, iha tempu ne’ebé loos no istóriku.
Espera ba futuru, ita hotu hametin liberdade imprensa, eleva tan performa kualidade jornalízmu, haburas espíritu jornalista nu’udar matan, tilun no ibun ba sosiedade demokrátiku no hametin nafatin performa ranking liberdade imprensa no ranking demokrasia iha ita-nia nasaun no iha mundu.
OBRIGADU BARAK!!!