Viqueque, 6 Juñu 2024 – Conselho de Imprensa de Timor-Leste (CI) liuhusi Diresaun Apoiu Jurídiku no Supervizaun (DRAJ), hala’o sosializasaun ba lei komunikasaun sosiál no regulamentu direitu resposta no retifikasaun ba autoridade munisipál Viqueque.
Atividade sosializasaun ne’e realizasaun iha salaun munisipál Viqueque, iha loron 06 Juñu 2024. Abertura ba atividade refere husi Prezidente Autoridade Munisípiu (PAM) Viqueque, Francisco Cruz Simões de Gonzaga Soares no Konselleira Isabel Maria de Jesus Fernandes.
Iha abertura, konselleira hatete sosializasaun ne’e nu’udar kompeténsia Conselho de Imprensa nian hodi bele konsensializa parte hotu-hotu hodi bele kontribui ba promove liberdade imprensa no liberdade espresaun iha Timor-Leste.
Nia hatutan, Estadu Timor-Leste, liuhusi Conselho de Imprensa iha dever tomak hodi hametin seitór komunikasaun sosiál sira hodi bele hala’o serbisu jornalízmu nian hodi bele fasilita no apoia direitu ema nian ba asesu informasaun.
Entretantu, Prezidente Autoridade Munisípiu (PAM) Viqueque, Francisco Cruz Simões de Gonzaga Soares hato’o agradese wa’in ba Conselho de Imprensa tanba bele hala’o ona atividade sosializasaun lei komunikasaun sosiál ba autoridade munisipál Viqueque.
Nia hatutan, atividade sosializasaun ne’e importante tebes tanba autoridade munisipál sira bele hasoru direta Conselho de Imprensa hodi bele rona lala’ok lejislasaun sira komunikasaun sosiál nian, nomos autoridade sira bele hato’o direta preokupasaun sir aba Conselho de Imprensa.
Partisipa iha atividade sosializasaun ne’e, PAM Viqueque, Administradór Postu Administrativu sira, PNTL, Diretór sira husi liña ministerial munispiu Viqueque, Sosiedade Sivíl, Partidu Polítiku, no Reprezentante Estudante Sekundária balun, hamutuk na’in 43.
Sosializasaun lei Komunikasaun Sosiál ne’e nu’udar kompeténsia Conselho de Imprensa nian hodi bele konsensializa públiku kona-ba importánsia serbisu órgaun no meiu komunikasaun sosiál sira nomós jornalista sira nia kna’ar hodi bele promove di’ak liutan Liberdade imprensa no Liberdade espresaun iha Timor-Leste. Aleinde ne’e, iha lei komunikasaun sosiál mós ko’alia kona-ba kompeténsia sira Conselho de Imprensa nian nu’udar entidade administrativa independente hodi tau matan ba lala’ok serbisu órgaun no meiu komunikasaun sosiál sira nian.
Kompeténsia Conselho de Imprensa haktuir iha lei Komunikasaun sosiál artigu 44 alinea a hatete Promove liberdade espresaun no imprensa nian no independénsia meiu komunikasaun sosiál nian sira husi influénsia ema se de’it, grupu ka interese polítiku no ekonómiku. (CI)